Gjykata e Krimeve të Rënda ka lënë në masën e sigurisë “arrest me burg”, 28-vjeçarin Selman Aliaj, i cili, të dielën që shkoi, vrau të atin me çekiç dhe trupin e hodhi në liqenin e Farkës. I pandehuri u shfaq në këtë seancë i shoqëruar nga tre oficerë të Policisë së Burgjeve.
Ai ishte tepër konfuz dhe rrallë herë iu përgjigj pyetjeve të gjyqtares së seancës. Prokurori i çështjes, pasi kërkoi masën e “arrestit me burg”, lexoi edhe dëshminë e dhënë të 28-vjeçarit para oficerëve të Policisë. Sipas dëshmisë, ditën e vrasjes, Selman Aliaj ishte duke shkarkuar disa materiale nga një mjet në banesën e tij, së bashku me të atin, Fejzo Aliaj në çastin kur ndodhi goditi me çekiç të atin.
Dëshmia e Selman Aliajt
Prokurori i çështjes ka dhënë detaje për mënyrën se si është kapur Selman Aliaj nga Policia dhe për dëshminë e tij, të dhënë para uniformave blu për ngjarjen makabre, që ndodhi në Shkozë. Sipas tij, gjithçka ka ndodhur më datën 22 dhjetor në orën 17:00 në banesën ku jetonte familja Aliaj.
“Më 22 dhjetor rreth orës 17:00, kam qenë duke ndihmuar babanë për të shkarkuar disa materiale të vjetra, që na i kishte sjellë tezja me një mjet, që ngarkon mallra. Materialet i kishim shkarkuar në oborr dhe po i sistemonim.
Babai më thotë në një moment se unë duhet të martohesha me vajzën, më të cilën më kishte fejuar ai dhe se nusen do ta kishim përgjysmë. Në këtë moment mora një çekiç artizanal dhe e kam goditur fort pas koke. Ai ka rënë pa ndjenja në tokë dhe më pas e kam marrë trupin, e kam mbështjellë me një batanije dhe e kam ngarkuar në bagazhin e makinës së vëllait, i cili jeton në Gjermani.
Kam shkuar deri në afërsi të Liqenit të Farkës dhe aty kam hapur bagazhin, por trupi i tij po lëvizte. Kam marrë sërish çekiçin dhe e kam goditur fort në ballë. Pastaj e kam nxjerrë trupin nga bagazhi i automjetit dhe e kam hedhur në Liqenin e Farkës.
Kam hipur në makinë dhe kam ndërruar rrobat duke veshur disa të tjera të pastra. Rrobat, me të cilat kisha kryer vrasjen, i kam hedhur në një kosh mbeturinash që ishte aty pranë Liqenit. Më pas, jam nisur me automjetin e vëllait drejt “Rrugës së Elbasanit”. Aty kam qëndruar për disa kohë në një fast-food ku kam konsumuar tri sufllaqe.
Pas kësaj, jam nisur pa folur me njeri drejt Kukësit. Gjatë rrugës jam telefonuar nga motra që më pyeste se ku isha. I thashë që nuk dua të flas dhe se nuk vij në shtëpi se isha larg. Të nesërmen kam vendosur që të kthehem dhe kam komunikuar me të shtëpisë, të cilëve u kam thënë se ndodhesha në zonën e Kamzës dhe se po kthehesha.
Aty më ka ndaluar Policia dhe jam arrestuar. Me babain kam pasur shumë konflikte, sidomos pasi më detyroi të fejohem pa pëlqimin tim. Kam dashur gjithmonë që të shkoj në Gjermani te vëllai dhe të fejohem andej.
Fejesa pa dëshirë ka qenë burimi i konfliktit. Im atë më fyente dhe më shante shpesh. Ai nuk sillej aspak mirë me mua. Një konflikt tjetër me tim atë ka qenë për disa hardhi rrushi, të cilat ai i preu edhe pse unë i kisha kërkuar që të mos i priste. Im atë ka qenë i martuar tri herë më parë dhe ishte divorcuar edhe nga nëna, edhe pse jetonim bashkë”, ka rrëfyer 28-vjeçari para Policisë.
Prokurori i çështjes, shtoi në seancë se rrobat, që kishte veshur autori i dyshuar i krimit, janë gjetur në koshin e mbeturinave, ashtu sikurse kishte thënë edhe i dyshuari. Gjithashtu, janë marrë njollat e gjakut në pantallonat e të pandehurit, në pjesën e prapme të mjetit, si edhe në dyshemenë e oborrit të banesës ku qëndronte familja./E. DELIU/
Marrë me shkurtime nga Panorama
Linku/ http://www.panorama.com.al/deshmia-e-plote-do-e-ndajme-nusen-pergjysme-djali-si-dhe-pse-e-vrava-babane/
