Reldar Dedaj
Kërkesa e Prokurorisë për heqjen e mandatit të deputetit Aqif Rakipi dhe Gledion Rehovica për shkak se kanë fshehur të shkuarën e tyre kriminale, është tashmë në dorën e KQZ-së. Kjo e fundit do të vendosë për pranimin ose rrëzimin e kësaj kërkese.
Rakipi deputet i PDIU-së dhe Rehovica i LSI-së akuzohen nga prokuroria se kanë përdorur emra të tjerë në Itali, ndërsa akuzohen edhe për vjedhje të vogla gjatë asaj kohe.
Rakipi është edhe deputeti që para pak muajsh ka aksidentuar një njeri me makinë.
Mediat kanë zbardhur të mërkurën kërkesën e Prokurorisë, në të cilën thuhet se Aqif Rakipi është raportuar në vitin 1998 për veprën penale të marrjes së mallrave të vjedhur në Itali, por me një tjetër emër, Skender Ejylbegaj.
Prokuroria thotë se kjo e dhënë është verifikuar nga shenjat e gishtave. Megjithatë, deputeti i PDIU-së për qarkun e Elbasanit ka deklaruar se nuk është dënuar asnjëherë, brenda dhe jashtë vendit.
Por Prokuroria e Përgjithshme disponon një dokument zyrtar nga Interpoli Roma në Itali, ku rezulton se deputeti i PDIU është arrestuar për vjedhje në vitin 1998.
Ndërsa, verifikimet e prokurorisë për deputetin e LSI në Berat, Gledion Rehovica kanë nxjerrë në pah faktin se ai nuk e ka plotësuar formularin saktë të dekriminalizimit, ku dyshohet se ka përdorur dhe një emër tjetër.
“Me shkresën nr 2001/ 40 KL prot. datë 22. 12. 2017 zyra qëndrore kombëtare e Interpol na informon se nga interpol Romë në Itali, pas krahasimit të gjurmëve të gishtave ka rezultuar si më poshtë: Gledion Rehovica është raportuar më datë 27.02. 1999 për veprën penale vjedhje dyqani me gjeneralitetet Kusta Mina lindur më 21. 12. 1978 në Shqipëri” sqaron Prokuroria.
Mësohet se prej disa muajsh të dy deputetët ishin nën hetimin e Prokurorisë në lidhje me dekriminalizimin, ndërkohë që në zgjedhjet e fundit parlamentare, Rehovica është vënë nën hetim edhe me akuzën e konsumimit të elementëve të veprës penale të “Korrupsionit aktiv në zgjedhje”.
Në legjislaturën e kaluar, Rehovica dhe Rakipi dhanë shenjat e gishtërinjve në prokurori pas dyshimeve se kishin pasur probleme ligjore jashtë vendit, por nën emra të tjerë. Më konkretisht dyshimet ishin për Italinë dhe Zvicrën, por për të dy deputetët gjatë legjislaturës së kaluar nuk pati kërkesa për ndërprerje mandati nga organi i akuzës.
Të martën Komisioni Qendror i Zgjedhjeve konfirmoi se ka marrë nga Prokuroria e Përgjithshme kërkesën për të hequr mandatet e deputetit të PDIU Aqif Rakipi dhe atij të LSI Gledion Rehovica.
Por nëse KQZ me shumicë votash vendos t’ia djegë mandatet këtyre dy deputetëve, vendi i tyre në Kuvend do të zihet nga dy femra.
Në listën e qarkut Elbasan merr mandatin Florenca Halili, ndërsa në listën e qarkut Berat merr mandatin Silvia Caka, e cila ka qenë deputete edhe në legjislaturën e kaluar. Prokuroria pretendon se dy deputetët e PDIU dhe LSI-së janë arrestuar në Itali për vepra penale, por kanë përdorur identitete të tjera.
Deputeti Aqif Rakipi deklaroi të martën për mediat se nuk kishte informacion, ndërsa theksoi se nuk kishte dënime. Sipas tij, as ka bërë gjë ndonjëherë dhe as nuk ka ndonjë dënim. Rehovica po ashtu më herët i ka mohuar akuzat e ngritura ndajt tij.
Ligji për dekriminalizimin u miratua në fillim të vitit 2016, pas një fushata gati dy vjeçare të Partisë Demokratike, që akuzoi shumicën se kishte përfshirë në listat për deputetë e kryetar bashkish persona me të shkuar kriminale.
Disa deputetë dhe kryetar bashkishë humbën mandatet pas verifikimeve që filluan me hyrjen në fuqi të këtij ligji. Për disa zyrtarë të tjerë për të cilët u kërkua heqja e mandatit, KQZ vendosi mes debateve se nuk kishte arsye të mjaftueshme për t’u hequr mandatin.
