Zbardhen dëshmitë që kanë dhënë dy personat që kishin dijeni për konfliktin mes Ida Dervishit nga burrit gardist, e që përfundoi me vrasjen e gruas.
“Panorama” shkruan se nga deklarimet që ka dhënë oficeri i Komisariatit nr.6 ka rezultuar që ai është vënë në dijeni vetëm për një rast konflikti në familjen Dervishi, por personi që e ka lajmëruar ka qenë vetë autori i krimit, Admir Dervishi.
E megjithatë ai ka pohuar se pasi ka konstatuar vetë dhunën që Dervishi kishte ushtruar ndaj së shoqes, i ka kërkuar viktimës që të bëjë kallëzim e po ashtu edhe të ëmës, por ato nuk kanë pranuar.
Ndërsa ka deklaruar se pavarësisht refuzimit për të denoncuar ngjarjen, ai ka mbajtur kontakt të vazhdueshëm me viktimën dhe autorin për disa ditë rresht.
Nga ana tjetër, oficeri i Gardës ka pretenduar se i ka kërkuar viktimës që të paraqitej në Gardën e Republikës në fund të vitit 2013, pasi ishte njohur me urdhrin e mbrojtjes dhënë nga Gjykata e Tiranës.
Sipas tij, në atë kohë e deri në përfundim të afatit të urdhrit të mbrojtjes, Admir Dervishi nuk e ka mbajtur pistoletën në shtëpi.
Kërkesa që ai i ka bërë viktimës për të shkuar në Gardë ka qenë për arsye se në raste të tilla bëhej një ndërmjetësim mes palëve, në mënyrë që autori, i cili në këtë rast ishte pjesë e Gardës, të mos e përsëriste dhunën./Panorama
