Deputeti i Partisë Demokratike, Endri Hasa, të enjten, nga foltorja e Kuvendit ka denoncuar me emra konkret aktorët që kanë dështuar sistemin e pikëzimit për ndihmën ekonomike.
Hasa theksoi se sistemi mund të jetë i paanshëm dhe objektiv, por njerëzit që fusin duart në sistem nuk mund të quhen të tillë.
Ai mori një rast konkret nga Bashkia Përrenjas, një vendim të datës dy shkurt për dhënien e ndihmës ekonomike për periudhën 1 deri në 31 janar, e firmosur nga Drejtorja Rajonale e Shërbimeve Sociale Shtetërore Elbasan, Marsida Haxhiu.
Sipas tij, nëse Haxhiu drejton një institucion të pavarur, nuk mund të justifikojë një militantizëm të tillë dhe kjo mjafton të shfletohet emri i saj në rrjetet sociale.
“Atëherë, problemi nuk qenka sistemi, por Marsida ose partia. Qenka qeveria ajo që do të bëjë vettingun e atyre që do të mbajnë shpirtin me bukë ose jo”,- tha Hasa.
(Foto: Endri Hasa, deputeti i PD)
Ai denoncoi edhe një fakt tjetër sesi ndihma ekonomike po përdoret për interesa elektoralë të PS.
Deputeti Hasa tha se në Librazhd, një bashki që drejtohet nga PS ka rritje pothuajse dyfishe të njerëzve që marrin ndihmë.
“Nga 1900 familje që trajtoheshin me ndihmë në 2015, tani marrin 3200, ndersa në Bashkinë Përrenjas që nuk drejtohet nga PS ka ulje me 270 persona”- tha Endri Hasa.
Deputeti i Elbasanit vuri në dukje se qeveria vazhdon të mbajë sekret sistemin e pikëzimit, duke mos e botuar në fletoren zyrtare për të manipuluar dhe përdorur politikisht mjerimin ekonomik të shqiptarëve.
Një dështim të tillë e pranoi edhe kryeministri Edi Rama ditën e sotme në seancën plenare, i cili mori një për një rastet e familjeve të varfëra që ishin hequr nga skema e ndihmës ekonomike dhe që i kishte vizituar Lulzim Basha.
Kryeministri tregoi në parlament verifikimet që kishte bërë qeveria dhe pranoi korrigjimet, si shenjë e vëmëndjes së qeverisë për të varfërit.
Por Rama dha provën më të qartë deri më sot, se sistemi i pikëzimit që mat varfërinë ka një marzh gabimi të frikshëm.
Nga 15 familje që përmendi Edi Rama në parlament, 9 prej tyre ishin rikthyer në skemën e ndihmës ekonomike,(pa llogaritur ata që pranuan një punë) pra marzhi i gabimit sipas shembujve që solli kryeministri shkon në 60%.
Më parë, kreu i qeverisë e ka quajtur “të ftohtë” sistemin e përzgjedhjes së familjeve të varfëra.
Në fakt, sistemi është një aplikacion kompjuterik i hartuar nga qeveria dhe ku sistemi i pikëzimit mbahet sekret.
Sot është provuar se marzhi i gabimit që mbart ky aplikacion është gati 60%.
Më poshtë janë të gjithë emrat që kishte vizituar Lulzim Basha në shtëpi dhe që ishin riverifikuar nga Edi Rama:
1) Zonja Burbuqe me tre femijë, u përfshi në skemën e ndihmës ekonomike nga Bashkia
2) Amarildo Hysa në Gjirokastër, 55 vjec, u përfshi në skemën e ndihmës ekonomike
3) Hyjrie Berisha, Lezhë, deklaroi se ishte e divorcuar, bëri deklarim të rremë por sërish u përfshi në skemën e ndihmës ekonomike
4) Ardjan Dani në Lezhë u përfshi në skemë dhe merr ndihmë ekonomike
5) Leonora Luka në Lezhë u përfshi në skemën e ndihmës ekonomike
6) Sabri Vironi në Vorë, nuk mori pikët, iu ofrua punësim, por nuk pranoi
7) Katriot Mihani në Kavajë, nuk mori pikët, riaplikoi dhe u përfshi në listën 6% të Bashkisë për ndihmën ekonomike
8) Liljana Eminaj, nuk mori pikët, riaplikoi dhe nuk fitoi, por u përfshi në 6% e Bashkisë
9) Fatmira Shima, u përfshi në skemën e ndihmës ekonomike me riaplikim
10) Bujar Luka në Vorë, nuk është i interesuar për punë, nuk u përfshi në skemë
11) Spahi Koçi në Vorë, iu ofrua punë dhe u punësua
12) Fradiol Luka, u kontaktua për intervistë pune, por nuk u paraqit
13) Artan Xhema, iu ofrua punë dhe ka filluar punë
14) Ylber Vocrri në Pukë, nuk deklaroi mjetin, megjithatë do të fillojë punë
15) Ilir Brahimi në Kamëz, u përfshi në skemën e ndihmës ekonomike
