Deputeti i ri i Lëvizjes Socialiste për Integrim, Enver Roshi, ka mbajtur sot fjalën e parë në Kuvend. Ai ka kërkuar nga autoritetet që të hetojnë rastet e kërcënimeve ndaj deputetëve të rinj, duke thënë se politikanët do ta çojnë Shqipërinë në Europë.
“Kërkoj që autoritetet të marrin masa që të mbështeten deputetët e rinj dhe mos kërcënohen më. Sot ne duhet të ndihemi të lirë në vendimmarrjen tonë. I kërkoj edhe grupeve parlamentare dhe kryesisë së Kuvendit të solidarizohen për çdo rast kur qytetarëve iu cenohen të drejtat. Ne politikanët do ta çojmë Shqipërinë në Europë”, ka thënë Roshi, duke iu referuar kërcënimit që iu bë deputetit të PD-së Ligoraq Karamelo dhe goditjes me bojë ndaj Ralf Gjonit të LSI-së.
Në fjalën e tij, Enver Roshi kërkoi nga Ministria e Shëndetësisë që të zbulojë pse ndodhi helmimi i njëmbëdhjetë nxënësve në Bulqizë duke kërkuar që të rritet vëmendja për sigurinë e nxënësve./Opinion.al
