Deputeti gjerman i rajonit të Bavarisë, Tobias Gottard ka zhvilluar një takim sot në Kryesinë e Kuvendit me disa deputetë. Për mediat, ai ka thënë se erdhi në Shqipëri për të parë nga afër situatën, duke qenë se në Gjermani dhe në Europë flitet shumë për Shqipërinë. Gottard ka thënë se vendi po ecën në rrugën e duhur me reformën në drejtësi, ndërsa bëri thirrje edhe për dialog mes palëve.
“Kam takuar kategori të ndryshme personash, grupe, kam takuar studentë, jam takuar me organizata dhe me anëtarë të Parlamentit. Një prej gjërave kryesore ka qenë reforma në drejtësi dhe implementimi i vettingut, mesa shoh, ju jeni në një rrugë të mbarë. Nuk besoj se më takon mua të vij në Shqipëri dhe të përpiqem të jap komentet e mia për situatën e brendshme politike, megjithatë dua të shpreh qëndrimin tim, pasi ata që e duan demokracinë janë pro dialogut me përgatitjen dhe dhënien e argumentave që përfaqësojnë”, është shprehur ai.
Gjithashtu Tobias Gottard ka thënë se do të mbështesë anëtarësimin e Shqipërisë në Bashkimin Europian.
“Si një evropian i bindur në vlerat e Bashkimit Europian, jam këtu për të mbështetur edhe çdo hap që Shqiperia po merr në rrugën e Bashkimit Europian, është një fitore si për Shqipërinë ashtu edhe për Bashkimin Europian”, ka thënë ai./Opinion.al
