Arrest me burg i caktoi masën e sigurisë gjykata e Tiranës, dentistit Redjan Rraja, i akuzuar për fshehjen e pistoletës së viktimës Elton Çiça, i cili u ekzekutua me dy plumba në një local në zonën e ish-bllokut.
Me kërkesë të prokruorisë, gjyqtari Asim Vokshi e vleftësoi të ligjshëm arrestin në flagrancë të dentistit Rraja dhe caktoi masën e sigurisë “arrest me burg” për akuzën e “Veprime që pengojnë zbulimin e të vërtetës”.
Para gjyqtarit, Rraja mohoi akuzën duke shpjeguar se ishte shok me viktimën dhe për shkak të profesionit i ka dhënë ndihmën mjekësore duke lëvizur edhe nga lokali. Sa i përket pistoletës së pretenduar, ai ka mohuar se ka marr ndonjë pistoletë nga çanta e viktimës, duke kërkuar lirimin nga burgu.
Këtë pretendim e kundërshtoi prokurori, i cili tha se nga pamjet e kamerave të sigurisë, duket që i dyshuari Rraja ka marr dicka nga çanta e viktimës e që dyshojmë se ka qenë pistoleta që ai mbante me vete. Por jo vetëm ky veprim, për prokurorin është i paligjshëm. Ai tha se edhe lëvizja e viktimës nga vendi I ngjarjes ka ndikuar në prishjen e provave.
Pretendim ky që u kundërshtua nga I dyshuari, duke thënë se Elton Çiça e lëvizëm për ti dhënë ndihmën e parë pasi ishte ende gjallë. Avokati, ka cituar komunikatën e policisë, duke thënë se edhe policia ka njoftuar se viktima ka ndërruar jetë rrugës për në Spital.
Sipas akuzës, rreth orës 22:10 minuta të mbrëmjes së 1 majit 2016, në rrugën “Gjin Bue Shpata” në ambientet e lokal ”Bar Kafe Deniro”, është qëlluar me armë zjarri shtetasi Elton Çiça, 36 vjeç, banues në Tepelenë, i cili ka humbur jetën gjatë trasportimit për në spital.
Në lidhje me autorin e vrasjes, policia dhe prokurori thanë se po vazhdojnë hetimet për të zbuluar identitetin e tij.
