SPAK ka bërë publike denoncimet e paraqitura nga subjekte të ndryshëm që lidhen me veprat penale në fushën e zgjedhjeve.
Përmes një njoftimi bëhet me dije se në periudhën mars – prill 2021 janë paraqitur një numër i konsiderueshëm kallëzimesh nga subjekte politike, shtetas të ndryshëm dhe policia gjyqësore në Drejtoritë Vendore të Policisë Shtetit.
“Në periudhën mars – prill 2021 janë paraqitur një numër i konsiderueshëm kallëzimesh nga subjekte politike, shtetas të ndryshëm dhe policia gjyqësore në Drejtoritë Vendore të Policisë Shtetit. Prokuroria e Posaçme ka vlerësuar të gjithë këto raste me seriozitet dhe ka dhënë zgjidhje ligjore rast pas rasti, duke njoftuar njëkohësisht dhe subjektet që i kanë paraqitur.
Për të gjitha rastet që është filluar procedim penal policia gjyqësore nën drejtimin e prokurorëve të posaçëm është duke kryer të gjitha veprimet e nevojshme hetimore me qëllim sqarimin e plotë të fakteve të kallëzuara dhe vënien para përgjegjësisë penale të personave ndaj të cilëve do provohet përfshirja në korrupsion aktiv apo pasiv në zgjedhje”, njofton SPAK.
Të dhënat statistikore të Prokurorisë së Posaçme, deri me datë 22 prill referojnë 55 kallëzime të bëra nga partitë politike, 50 prej tyre janë bërë nga PD. Policia gjyqësore ka referuar 10 raste, Prokuroritë e Rretheve Gjyqësore 4 raste, nga qytetarët 4 kallëzime dhe nga institucioni i Presidentit të Republikës 18 raste, informacione.
Ndërkohë, për 32 raste ka nisur procedimi penal. Janë dërguar për verifikime paraprake në Policinë e Shtetit 15 raste si dhe janë dërguar për kompetencë prokurorive të rretheve gjyqësore 23 raste./Opinion.al
