Gjykata e Apelit në Shkodër la sot në fuqi vendimin e shkallës së parë për të ashtuquajturin Tony Montana i Lezhës. Ai u dënua me dy vite burg. Po i njëjti dënim u dha për bashkëjetuesen e tij Lula Marku. Por sakaq i vëllai hodhi akuza ndaj gjykatës duke thënë se dënimi është absurd dhe se i kanë kërkuar para për ta nxjerr nga burgu.
Historia
Filip Shtjefni ose Tony Montana i Lezhës u dënua për “heqje të paligjshme të lirisë” dhe “dëmtime të tjera me dashje”. Sëbashku me Lula Markun akuzohen se kanë shfrytëzuar për prostitucion 24 vjeçaren Eglantina Metolli në një lokal të marrë me qira në Lezhë dhe se për tre ditë me radhë çifti që bashkëjetonte e ka mbajtur të mbyllur në një banesë duke e keqtrajtuar derisa sa vajza në fjalë është arratisur duke u hedhur nga dritarja dhe duke tentuar më pas vetëvrasjen.
Për këto akuza Gjykata e shkallës së parë në Lezhë e dënoi me dy vite burg Filip Shtjefnin dhe bashkëjetuesen e tij Lula Marku. Gjykata e Apelit në Shkodër la në fuqi këtë vendim. Në sallën e gjyqit i ashtëquajturi Tony Montana hodhi poshtë akuzat duke thënë se 24 vjeçarja ka ardhur nga Turqia me dëshirën e saj për të punuar tek lokali në Lezhë dhe se 50 vjeçari ka qenë në komunikim të vazhdueshëm me familjen e saj.
Po ashtu mohon se e ka keqtrajtuar apo shfrytëzuar për prostitucion dhe sipas tij dhe avokatit mbrojtës Blerim Bazhdari nuk ka asnjë provë për këto akuza. E vetmja gjë që ka ndodhur është një shpullë që Filip Shtjefni i ka rënë 24 vjeçares për një keq shërbim ndaj një klienti në lokal dhe asgjë më shumë.
