Gjykata e Tiranës ka shpallur fajtorë 38 persona për dhunë ndaj policisë gjatë protestës opozitare të 13 prillit 2019 para Kryeministrisë dhe Parlamentit.
Sipas A2 CNN, dy persona janë dënuar me 1 vit burg, Armando Gecaj dhe Florian Markun. Sipas gjykatës, Gecaj ka mbajtur një zinxhir në duar me të cilin ka qëlluar punonjësit e policisë, ndërsa Florian Marku është personi që urinoi tek dera e kryeministrisë.
Dy protestues të tjerë janë dënuar me nga 10 muaj burg dhe një tjetër me 5 muaj. Për tetë të tjerë masa e dënimit ka qenë 4 muaj burg, por janë lënë përfundimisht në shërbim prove për 8 muaj. Ndërsa dënimet e lehta me burg të pjesës më të madhe të të pandehurve, plot 25 të tillë, janë konvertuar në punë të papaguar në interes të publikut, 1250 orë punë në total.
Procesi ndaj protestuesve nisi në nëntor të vitit 2019. Gjykata në dhënien e vendimit të saj ka marrë në kosideratë pamjet filmike të protestës si edhe raport shërbimet e punonjësve të policisë.
Në përfundim të një procesi të nisur në nëntor të vitit të kaluar, gjykata ka vlerësuar se të gjithë të pandehurit ishin fajtorë për “kundërshtim të punonjësve të policisë”. Fajësia e tyre u provua nga këqyrja e pamjeve filmike të protestës si edhe raport shërbimet e punonjësve të policisë.
Të gjithë të lartpërmendurit janë vënë re që gjatë protestës janë përplasur me kordonin policor tek kryeministria, si edhe tek parlamenti. Sipas vendimit, të gjithë të dënuarit me burg e kanë shlyer dënimin e tyre me kohën e paraburgimit, ose të qëndrimit në arrest shtëpie./ Opinion.al
