Moti i keq i ditëve të fundit ka shkaktuar dëme në shumë nga qytetet e vendit. Për shkak të erërave të forta janë rrëzuar pemë dhe gjithashtu mësohet se janë dëmtuar linjat e transmetimit të energjisë elektrike.
Disa nga qytetet me më shumë probleme sipas OSHEE janë Librazhdi, Vlora, Shkodra etj. Përmes njoftimeve nga OSHEE bëhet e ditur situata aktuale në këto qytete.
“Në Librazhd vijon puna në kushte shumë të vështira reshjesh të dendura shiu dhe erëra rë forta, për rivendosjen e linjave të transmetimit të energjisë elektrike. Pak orë më parë për shkak të erërave të forta, rrëzimit të shumë pemëve të larta, janë dëmtuar linjat e Tensionit të Mesëm 6 Kv të si dhe të linjës 3 në Nënstacionin Elektrik të Përrenjasit që furnizon me energji një pjesë të qytetit të Përrenjasit dhe Njësisë Administrative Stravaj,”-thuhet në njoftimin e OSHEE-së.
Ndërkohë edhe në Shkoder vijon puna për riparimin e rrjetit elektrik, pas dëmtimit të dy fiderave 4 dhe 8 të N/St Shkodra2. Avaria e shkaktuar nga moti keq la pa energji banorët e zonave Bërdicë e Madhe dhe e Mesme, Belton, Baçadhek, Zogaj, Pazar dhe Maliheb.
Edhe në qytetin e Vlorës është duke u ndërhyrë për rregullimin e linjave, ndërkohë që qyteti bregdetar është rajoni më i prekur nga moti i keq.
“Reshjet e forta, shoqëruar me stuhi dhe shkarkesa atmosferike dëmtuan rrjetin elektrik në disa zona, kryesisht përgjatë bregdetit por edhe ne Lumin e Vlorës. Konkretisht në Nartë, rrëzuar shtylla, në Himarë është stakuar fideri 1, në Dhërmi te pedonalja është shembur një kabinë, Qeparoi dhe Kudhës janë pa dritat pas dëmtimit të fiderit 6 pranë Porto Palermos, në Rradhimë është shkëputur përcjellësi Tm, pjesë e fiderit 2, kurse në Selenicë ka probleme në kabinën “Resulaj”, gjithashtu në fshatrat Bolene dhe Vranisht. Aktualisht brigadat e avarive OSHEE Vlorë pasi morën masat tekniko-organizative janë shpërndarë në zonat e prekura, ku në disa akse është duke u punuar, në kushte aspak të favorshme moti,”-shkruhet në njoftimin e OSHEE./Opinion.al/
