Ish-Presidenti i SHBA Donald Trump do të paraqitet sot para gjykatës, ku do t’i lexohen akuzat penale të ngritura ndaj tij nga një juri e madhe.
Trump do të flasë sot para gjykatës në Nju Jork pasi përballet me padinë penale që rrjedh nga dyshimet se në vitin 2016, ka paguar për të blerë heshtjen e aktores së filmave pornografikë Stormy Daniels.
Ndërkaq, sipas BBC Trump ka reaguar dhe e ka quajtur këtë ditë ‘tragjike për Republikën tonë’.
Një e-mail i është dërguar kontakteve të tij me përshkrimin “Email-i im i fundit para arrestimit tim” në të cilën i kërkon njerëzve që të “shpëtojnë Amerikën” dhe shton një link për mbledhjen e fondeve.
Ai gjithashtu shpreh shqetësimin se SHBA po shndërrohet në një “vend marksist i botës së tretë”.
Menjëherë pasi u publikua emaili, Trump postoi një mesazh të plotë në Truth Social, platformën e mediave sociale që ai zotëron, duke kritikuar vendndodhjen e Gjykatës së Nju Jorkut ku do të paraqitet duke thënë se është vend i padrejtë pasi disa zona aty kanë votuar vetëm 1% Republikanët.
Po ashtu i cilësoi gjyqtarët që do e gjykojnë si “partizanë” dhe thotë se familjarët e tij janë persona të njohur si “urryes të Trump”.
“Gjyq kangurësh”, shkruan ndër të tjera Trump.
