Policia ka vënë në pranga një person i cili dyshohet se është i përfshirë në atentatin e bërë ndaj prokurorit të Durrësit, Arjan Ndoji dhe Landi Muharremi, i njohur si “i forti i Sukthit”.
Mësohet se i arrestuari është identifikuar si Redjan Rraja, i cili ka rënë në pranga e policisë në momentin që po tentonte të largohej jashtë Shqipërisë. Bëhet me dije se Redjan Rraja është nipi i deputetit të Partisë Socialiste, Rrahman Rraja.
Gjatë deklaratës së tij në Polici, mësohet se Rraja nuk ka pranuar asnjë përfshirje në atentatin e ndodhur pasditen e së premtes.
Atentati u bë në vendin e quajtur “Mbikalimi i Shkozetit” në Durrës, ku makina që udhëtonte prokurori Ndoj, Landi Muharremi dhe Andi Maloku, shoferi i prokurorit, u qëllua me breshëri kallashnikovi.
Për shkak të sulmit prokurori mori dy plumba, ndërsa Landi Muharremi u plagos në nofull. Në gjendje më të rëndë paraqitet Andi Maloku, i cili i është nën shtruar disa ndërhyrjeve kirurgjikale. Deri më tani policia kishte shoqëruar disa persona lidhur me ngjarjen, ndërsa gjatë orëve të mbrëmjes kishte ushtruar kontroll në Durrës, Tiranë dhe zonat e Fushë-Krujës, ku sekuestroi në cilësinë e provës materiale, armë dhe municione./ Opinion.al
