Presidenti i Republikës nuk do t’i dekretojë emërimet e Arben Ahmetajt dhe Milva Ekonomit në Ministrinë e Financave dhe atë të Ekonomisë. Derisa Gjykata Kushtetuese të shprehet për kërkesën që ai i dërgoi një ditë më parë, dy dekretet do të mbeten pa firmë, pavarësisht afatit 7 ditor që parashikon Kushtetuta.
Në kërkesën që i drejtoi Gjykatës, kreu i shtetit kërkon interpretimin e nenit 98 pika 1 të kushtetutës dhe një përgjigje nese ai mund t’i dekretonte dy ministrat në një kohë që parlamenti nuk mori në shqyrtim në seancën e të enjtes dekretet e tij për shkarkimin e Shkëlqim Canit nga Financat dhe Arben Ahmetajt nga Ekonomia, duke mos u dhënë atyre fuqi.
“A mundet Presidenti i Republikës të emërojë një Ministër të propozuar nga Kryeministri, ndërkohë që Kuvendi nuk i ka dhënë fuqi Dekretit të shkarkimit të ministrit paraardhës?”, është pyetja që i parashtron presidenti kësaj gjykate.
Gjykata Kushtetuse duhet të japë përgjigje edhe për disa pyetje të tjera mbi këtë çështje. “A mund të kërkohet në të njëtën kohë nga ana e Kryeministrit shkarkimi dhe emërimi i një ministri, ndërkohë që nevojitet një afat i caktuar kohor referuar Kushtetutës që të realizohet procedura e shkarkimit e një ministri? Çfarë natyre kanë dekretet e Presidentit të Republikës sa i takon shkarkimit dhe emërimit të ministrave? A quhet i rrëzuar apo i pranuar propozimi i Kryeministrit, për emërim apo shkarkim ministri, në rast se Presidenti nuk dekreton atë brenda afatit 7 ditor? Sa kohë që dekreti për emërimin e Ministrit është detyrim kushtetues për Presidentin, a ekziston mundësia që Presidenti të kërkojë verifikim të kandidatit të propozuar, nëse ky i fundit i plotëson kriteret kushtetuese dhe ligjore dhe nëse jo, a mund t’i kërkohet Kryeministrit rishikimi i kandidaturës?
Deri në sqarimin që pritet nga Gjykata Kushtetuese, dy dekretet për emërimin e ministrave të rinj, sipas propozimit të kryeministrit, do të mbeten pa firmën e kreut të Shtetit.
Juristët shprehen se procedura e ndjekur nga Presidenti i Republikës për dekretimin e shkarkimit dhe emërimit të ministrave të rinj është konform kushtetutës dhe nuk lë shteg për interpretime politike dhe se firma e Kreut të shtetit në dekretimin e ministrave nuk është thjesht simbolike.
Tv Klan
