Një akt të turpshëm. Kështu e cilëson dekorimin e hetuesit të At Zef Pllumit nga qeveria shqiptare, përgjegjësi i bibliotekës Françeskane në Shkodër Padër Vitor Demaj.
Sipas tij me këtë gjest dekorimi, është njëlloj sikur të vendosësh antivlerat si vlera kombëtare.
Vitor Demaj: “Kohët e fundit, edhe mund ta them pa drojë, mbas disa dekorimeve që qeveria i ka bërë disa personave ndër këto edhe hetuesi i At Zef Pllumit për mendimin tim si françeskan , si pjestar i klerit dhe si botues i veprës së tij është një akt vërtet i turpshëm sepse është janë ende të freskëta torturat, vrasjet e asaj kohe. Të dekorosh hetues dhe persona të tillë si vlera është sikurse të vendosësh antivlerën si vlerë kombëtare.Libri është një dëshmi pikërisht e kësaj.
Njeriu ndonjëherë rrezikon të harrojë të kaluarën , bëhet edhe më dëshire edhe me qëllim.Por kurrësesi dëshmia e At Zef Pllumit nuk e lejon që e kaluara të mbizotërojë dhe sot e kësaj dite. Ky akt që është bërë me dekorimin e këtyre njerëzve që ishin pjesë e kësaj makine vrastare ndaj popullit shqiptar, jo vetëm ndaj klerëve por ndaj të gjithëve është një akt që duhet të rimendohet që mos të përsëritet më sepse vriten ndjenjat e njerëzve. Hidhet baltë mbi ata njerëz të cilët me jetën e tyre kanë dëshmuar vlerat e lirisë, mendimit , bashkejetesës dhe një demokracie të vërtetë. Të dekorosh persona të tillë është me vërte një akt i çuditshëm. Janë 25 vite nuk është se kaloi një shekull dhe kujtesa duket sikur po zbehet.Libri i At Zef Pllumit ndihmon që të rizgjojmë edhe njëherë kujtesën tonë historike gjithmonë pa inate dhe hakmarrje por të kujtojmë.
Përveç veprës së At Zef Pllumit ne do të nxjerrim së shpejti pas pak ditësh dhe librin e Padër Konrad Gjolaj . Është një libër kryevepër që dëshmon vuajtjet , persekutimin e popullit tonë gjatë komunizmit.Do të ishte rëndësi e madhe që të botoheshin edhe kujtimet e Don Simon Jubanit.Me shkrimet e tyre ndihmojnë sot jo vetëm ne por edhe të rinjtë që ato ngjarje të frikshme e të tmerrshme të mos përsëriten më.”
Këto ditë mes zhurmës dhe polemikave të dekorimit të Shyqyri Çokut dhe disa ish-funksionarëve të lartë të regjimit, kisha Françeskane ka sjellë të ribotuar për lexuesin tre vëllimet e padër Zefit, “Rrno për me tregue”.
“Ky libër duhet të na shërbejë për të mos harruar të shkuarën tone” shton Padër Demaj.
E në fund ai përcjell edhe mesazhin e këtij libri, në të cilin kanë ardhur të plota dëshmitë e vuajtjeve të klerit katolik, por jo vetëm gjatë regjimit të egër diktatorial.
Ky botim i Françeskanëve rivendos edhe njëherë tjetër At Zef Pllumin në serinë e botimeve të kësaj shkolle, në bibliotekën e së cilës gjendjen mbi 13 mijë botime.
Nga Bepin Kolvataj (Ora news)
