Kreu i Partisë Demokratike, Lulzim Basha, ka reaguar pas rekomandimit të qeverisë, për mësim të alternuar në shkolla prej datës 1 Dhjetor.
Kryedemokrati përmes një postimi në “Twitter” ka akuzuar kryeministrin Edi Rama se nuk ka asnjë plan për të përballuar situatën e pandemisë. Ai shkruan se vendi ka nevojë për një qeveri që merr vedimet e duhura për njerëzit.
“Dje Rama deklaroi se nuk ka asnjë arsye për të mbyllur shkollat sepse “fëmijët nuk të infektojnë me koronavirus”. Ndërsa sot shpalli mbylljen e pjesshme të shkollave. Rama e ka humbur kontrollin ndaj pandemisë dhe as që ia ka idenë se çfarë duhet bërë. Rama nuk ka asnjë plan. Dhe pa plan, nuk mund ta fitosh luftën kundër pandemisë. Shqipëria ka nevojë për një qeveri që punon dhe merr vendimet e duhura për njerëzit, jo për qeverinë Rama që çfarë thotë sot, nuk thotë nesër!”, shkruan Basha
Më herët, ministria e Shëndetësisë, Ogerta Manastirliu, bëri me dije se pas këshillimit të Komitetit të Ekspertëve, qeveria ka vendosur: t’i rekomandojë MASR që, nga data 1 Dhjetor, të aplikojë skenarët që parashikojnë kryerjen e mësimit të alternuar, pra në formën tradicionale, me prani fizike duke e kombinuar dhe me mësimin ne distance (online)./ Opinion.al
