Ish-kryeministri Berisha deklaroi dy ditë më parë se polica shqiptare nuk është përfshirë në hetimin e grupit të trafikut të drogës të udhëhequr nga Klement Balili, i njohur ndryshe edhe si “Escobari i Ballkanit”, bashkë me palën greke, DEA-n amerikane dhe palën italiane.
Por në një deklaratë të Europol, ky fakt hidhet poshtë pasi thuhet se: “Më 9 maj 2016, 17 persona (11 grekë dhe 6 shqiptarë) pjesë e një rrjeti të organizuar kriminal, të përfshirë në trafik droge në shkallë të gjerë, janë arrestuar gjatë një operacioni të zbatimit të ligjit të drejtuar nga Greqia dhe të mbështetur nga Shqipëria, Belgjika dhe Europol, raporton BW.
Europol shton se operacioni është ende në vijim dhe priten arrestime të tjera, ndërsa Shqipëria përmendet si vend që ka mbështetur hetimet bashkë me Belgjikën dhe vetë Europol.
Hetimet për “Escobarin” e Ballkanit kanë filluar që 1 vit më parë, por nuk ka pasur arrestime për mungesë provash. Sakaq mësohet se Klement Balili, ish drejtor i Transportit në Sarndë është zhdukur nga Shqipëria që pas publikimit të emrit të tij në media.
