Komisioni i ligjeve ka rrëzuar sot me votat me mazhorancës dekretin e Presidentit Meta për kthimin për rishqyrtim në Kuvend të ligjit mbi vetëqeverisjen vendore.
Në argumentimin e Presidentit, thuhej se ndryshimet ligjore cënojnë procesin vendimmarrës të Këshillave Bashkiake në lidhje me tjetërsimin e pronave të tyre.
Gjatë seancës, këshilltari i presidentit Bledar Dervishaj tha se ndryshimet e propozuara në nenin 3 dhe 4 janë të pajustifikuara.
“Presidenti Meta shqyrtoi ligjin për ‘Vetëqeverisjen vendore’ bazuar në përmbajtjen e akteve pasi bëri një vlerësim të kujdesshëm në raport me interesin publik. Dispozitat e nenit 1 janë një hap pozitiv. Referuar nenit 3 dhe 4 gjatë shqyrtimit janë propozuar disa ndryshime që synojnë procesin vendimmarrës. Këto ndryshime janë të pajustifikuara sepse nuk garantojnë mbrojtjen e interesit publik. Nëpërmjet ndryshimeve referuar nenit 3 dhe 4 ulet kontrolli i shtetit” tha Dervishaj.
Pas tij fjalën e mori Bashkim Fino i cili tha se relacioni është ndërtuar kundër tij personalisht.
“Në gjithë relacionin që kam lexuar po vërej me keqardhje se i gjithi është drejtuar kundër relatorit. Mesa duket presidenti e paska personale me mua. Presidenti i di procedurat si veprohet kur një projektligj vjen nga qeveria. Nuk mund të ngacmojmë ligjin sa herë ka kërkesa. Ne duhet ta rrezojmë dekretin e presidentit për nenin 3 dhe 4.” tha Fino
“Nuk kemi asgjë personale me relatorin”, u përgjigj Dervishaj.
Tre deputetët e opiozitës në Komision, Andi Përmeti, Adriatik Alimadhi dhe Elda Hoti ishin në mbështetje të dekretit të Metës. /Opinion.al
