Pas pesë vitesh e gjysmë në krye të kombëtares së Shqipërisë, Xhani De Biazi ka nisur një aventurë të re si trajner. Ai ka marrë përsipër drejtimin e Deportivo Alaves në La Liga të Spanjës, duke e nisur me fitoren 2-0, në transfertën ndaj Levantes.
Duke folur për “Supersport”, 61-vjeçari nga Sarmede e Italisë do të nënvizonte: “Besoj se kam ardhur në një prej kampionateve më të rëndësishme në Europë. Ishte zgjedhje futbollistike, pasi për para mund të kisha bërë një tjetër zgjidhje. Jam në një klub serioz, edhe pse jo shumë i madh.
Jam shumë i kënaqur që fituam në ndeshjen e shtatë, e para e imja, pasi ekipi vinte pas 6 humbjesh dhe ishte rezultat i rëndësishëm, sepse na jep besim, mua dhe djemve, për të ardhmen. Si fillim punova pak në aspektin taktik dhe atë mbrojtës. Fola me ekipin për besimin që duhet të kemi për njëri-tjetrin.
Më mungon Shqipëria, më shumë tani që nuk jam sesa kur isha. Kur ke kaluar një periudhë të mirë në një vend, ke gjithmonë nostalgji. Një ditë më parë mora një mesazh nga presidenti Duka dhe i thashë: po fituat me Spanjën, do t’ju bëjnë monument në Itali.
Uroj që të fitoni aty, edhe pse në ndeshjen e fundit do të bëj tifo për Shqipërinë.”
