De Biazi nuk e fsheh dëshirën për të drejtuar Anglinë, madje e shpreh hapur duke thënë se është i duhuri për t’i dhënë “Tre luanëve” suksesin e munguar.
Në një intervistë ekskluzive për “SunSport”, trajneri italian thotë se është i nderuar që emri i tij është përfolur për kombëtaren e Anglisë.
“Lojtarët kanë talent dhe cilësi dhe kanë nevojë që të zbulohen në mënyrën e duhur. Të punosh si trajner i Anglisë do të ishte një mundësi e madhe që nuk mund të refuzohet. Jam i bindur dhe e them me shumë përulësi, që mund të arrimë rezultate të mëdha bashkë”,-ka thënë De Biazi për “SunSport”.
Tabloidi britanik e ka ilustruar prononcimin e De Biazit me foto të tij nga kampionati europian “Francë 2016”, duke përfshirë edhe pamje nga pritja që kryeministri Edi Rama i bëri atij në Tiranë./panorama
Për Kombëtaren shqiptare të futbollit, media britanike përmend edhe fitoren ndaj Portugalisë në eliminatore, ndërsa thekson se tekniku italian ishte në prag të kualifikimit me kuqezinjtë për në fazën e 1/8-ave.
Deklarata e De Biazit vjen në kohën kur në Angli flitet për një zëvendësues të Roi Hoxhsonit. Ky i fundit dha dorëheqjen pasi u eliminua në Europian nga Islanda.
