Trajneri i Kombëtares Shqiptare De Biasi ka folur në një konferencë shtypi për largimin e Taulant Xhakës.
Duke folur nga Durrësi për ndeshjen e nesërme në “Elbasan Arena” mes Shqipërisë dhe Bosnje Hercegovinës, tekniku italian nuk ka treguar detaje të sherrit me Xhakën, duke u shprehur me fjalët se “nuk e them dot të vërtetën e plotë. Detyra ime është të mbroj lojtarin”.
Megjithatë De Biazi nuk ka kursyer kritikat duke thënë se në grup duhet të respektohen rregullat nga të gjithë dhe për të gjithë. Ai shtoi se Xhaka është një lojtar si gjithë të tjerët dhe ajo që ka rëndësi është Kombëtarja Shqiptare, e jo një futbollist.
“Lojtarët të respektojnë grupin dhe trajnerin. Për të qëndruar në një grup ka rregulla. E rëndësishme është skuadra dhe jo Xhaka. Ekipi ku luan nuk është përcaktues për Kombëtare”, u shpreh Gianni De Biasi.
Pas ndeshjes me Italinë, në kombëtare kanë nisur pakënaqësitë pas largimit të Taulant Xhakës nga skuadra pas përplasjes që pati me trajnerin De Biasi. Në opinionin publik dhe në media është komentuar gjerësisht gjatë këtyre ditëve, se kush është fajtori për situatën e krijuar në Kombëtaren Shqiptare.
