Presidenti Ilir Meta ka takuar ambasadorët e Bashkimit Europian. Mësohet se takimi ka zgjatur rreth 2 orë, në Pallatin e Brigadave. Presidenti ka biseduar me ta në lidhje me krizën politike, dekretin për anulimin e datës së zgjedhjeve dhe i ka sqaruar për zgjidhjen e situatës.
Firma që Kreu i shtetit hodhi mbi dekretin për anulimin e 30 Qershorit si datë të zgjedhjeve vendore, i ka nxjerrë palët në fushën e një beteje të ashpër.
Një ditë pasi parlamenti i dedikoi mbi 6 orë debate, vendimit të kreut të shtetit, duke e konsideruar anulimin e zgjedhjeve një shkelje të hapur të Kushtetutës dhe tejkalim të kompetencave, Meta ritheksoi sot se “Dekreti është në fuqi. Dekreti është i detyrueshëm për zbatim nga të gjithë. Kush dëshiron të ecë në rrugën e paligjshmërisë, le të vazhdojë! Është e drejta e tij. Presidenti ka të drejtë që të bëjë thirrje çdo ditë për reflektim”.
Nga ana tjetër Meta i është drejtuar Komisionit Qendror të Zgjedhjeve duke i kërkuar informacion mbi numrin e mandateve dhe listën me emrat e deputetëve./ Opinion.al
