Një sasi tritoli ka shpërthyer gjatë orëve të para të mëngjesit të djeshëm, në makinën e një emigranti të sapokthyer nga Italia me qëndrim aktual në Kombinat.
Sipas Policisë, ngjarja ka ndodhur rreth orës 00:20, në rrugën “Llambi Bonata”, në garazhin e banesës së shtetasit me iniciale G.Sh., 37 vjeç, banues në Itali.
Në sallën operative të policisë është njoftuar se rreth orës 00:20, në rrugën “Llambi Bonata”, në garazhin e banesës së emigrantit është dëgjuar një zhurmë e fuqishme e shpërthimit.
Menjëherë në vendngjarje kanë shkuar efektivat e Policisë së Komisariatit nr.6, ekspertët xhenierë dhe grupi hetimor, ku nga këqyrja e vendit të ngjarjes rezultoi se poshtë makinës ishte vendosur lëndë plasëse.
HETIMI NË VENDIN E NGJARJES
Grupi i hetimit ka shkuar në vendin e ngjarjes dhe ka nisur hetimet për shpërthimin. Gjatë kqyrjes në vendin ku ndodhi shpërthimi, policia tha se në tokë, poshtë derës së pasme të pasagjerit, është vendosur një sasi e vogël lëndë plasëse, ku si pasojë e shpërthimit ka pasur dëme të vogla materiale të pjesëve plastike të derës së pasme të pasagjerit dhe të shasisë së automjeti tip “Audi”, në pronësi të këtij shtetasi.
Mendohet se vendosja e lëndës plasëse poshtë makinës është bërë pasi porta e garazhit është lënë e hapur nga ana e pronarit
“Nga hetimet paraprake, dyshohet që shkak i kësaj ngjarjeje të jetë një konflikt i vjetër. Grupi hetimor po punon për zbardhjen e ngjarjes me qëllim identifikimin dhe kapjen e autorit të kësaj vepre penale”, theksoi Policia në deklaratën e saj në lidhje me ngjarjen.
Pas mbledhjes së provave në vendin e ngjarjes, Policia ka marrë në pyetje pronarin e automjetit. Ai ka mohuar të ketë konflikte apo mosmarrëveshje me njeri, ndërkohë që Policia, pas kësaj dëshmie, ka nisur hetimet në lidhje me shkakun e ngjarjes.
Bazuar në informacionet e marra në rrugë operative, Policia ka ngritur dyshime në dy pista në lidhje me shkakun e ngjarjes.
Sipas Policisë, bazuar në pistën e parë, motivi i ngjarjes dyshohet të jetë një lidhje e prishur dashurie mes emigrantit dhe një vajze banuese në zonë.
Ajo mësohet se ka një parukeri në zonën ku ndodhi ngjarja. Pas këtyre të dhënave, Policia ka shoqëruar parukieren në fjalë, e cila është
marrë në pyetje në cilësinë e personit që ka dijeni për rrethanat e ngjarjes. Pasi është pyetur si person që të ketë kryer ngjarjen nëpërmjet
personave të tjerë në shenjë hakmarrjeje, e dyshuara mësohet se e ka mohuar.
Pas marrjes në pyetje në polici, e dyshuara është lënë e lirë. Nga ana tjetër, Policia mësohet se ka vijuar me hetimet e saj në lidhje me
konflikte të tjera të mundshme të pronarit të automjetit. Nisur nga sasia e vogël e lëndës plasëse të vendosur në automjet, Policia ka ngritur
dyshime se ngjarja mund të ketë qenë një paralajmërim apo një nxjerrje inati./ Panorama.al
