Një grua ka humbur jetën në një aksident të ndodhur në aksin rrugor Lezhë-Shkodër pasditen e së premtes. Dy automjetet u përplasën në vendin e quajtur “Kryqëzimi i Blinishtit” rreth orës 17:00.
Përplasja e mjeteve ka qenë e fortë, duke sjellë vdekjen e menjëhershme të gruas e cila është identifikuar si shtetasja Fatmira Ndregjoni rreth 50 vjeçe, e cila ishte pasagjere në sendelen e pasme të mjetit tip “Benz”.
Nga aksidenti kanë mbetur të plagosur rëndë dhe 5 persona të tjerë të cilët janë dërguar me urgjence në Spitalin e Lezhës për të marrë ndihmën mjekësore.
Për të nxjerrë viktimën dhe dy prej të plagosurve të cilët lëvizinin me mjetin tip “Benz” është dashur më shumë se 30 minuta, ndërsa kanë ndërhyre forcat zjarrfikëseve duke prerë disa pjesë të mjetit për shkak të dëmtimeve të shumta që kishte pësuar.
Nga hetimet e para të policisë është bërë e ditur se shkak për aksidentin është bërë dalje në mënyre të menjëhershme e automjetit tip “Benz” në superstrade. Drejtuesi i mjetit nuk e ka parë mjetin tjetër i cili po lëvizte me shpejtësi, duke sjellë edhe përplasjen.
Vendosja e barrierave në “Kryqezimin e Blinishtit” ka bllokuar pamjen e drejtuesve të mjeteve, dike krijuar një kthese 90 gradë. Kjo ka bërë që ky vend të kthehet një burim të sigurtë aksidentesh. Vetëm një javë më parë ndodhi një aksident i tillë por fatmirësisht pa viktima. Autoriteti Rrugor Shqiptar vijon të heshtë përballë kësaj problematike e cila është ngritur muaj më parë nga media dhe banorë të zonës.
