Ky është momenti kur autorët e dyshuar të plagosjes mesditën e së hënës në lagjen ‘Voloreka’ të Pogradecit largohen nga vendngjarja.
Tv Klan ka siguruar këto pamje ekskluzive ku shihet automjeti tip Golf 6 me targë AB 416 FP me të cilën dyshohet se lëvizën autorët e plagosjes Firdeus Berberi dhe Griseld Maxhari të shpallur në kërkim nga policia.
Siç shihet në pamjet e fiksuara nga një kamera sigurie në një karburant fare pranë vendit ku mbeti i plagosur Johan Muçllari, makina tip Golf largohet me shpejtësi. Ky automjet, së bashku me një Benz dhe një BMW X5 janë sekuestruar nga policia dhe ka dyshime se janë përdorur nga autorët e dyshuar për t’u larguar nga vendngjarja.
Lidhur me këtë ngjarje policia arrestoi 5 persona të cilët sipas uniformave blu kanë ndihmuar dy autorët të arratiseshin. Johan Muçllari, i biri Jetmir Muçllarit, pronari i hotel Volorekës, mbeti i plagosur me armë zjarri mesditën e së hënës në Pogradec.
22-vjeçari shkoi vetë në spitalin e qytetit i plagosur në këmbë ndërsa aktualisht është nën kujdesin mjekësor të Spitalit të Traumës jashtë rreziku për jetën.
Sipas burimeve, gjithçka ka nisur pas një përplasje fillimisht verbale mes të rinjve e më pas në përdorimin e armëve nga 2 autorët të shpallur në kërkim.
I gjithë konflikti i regjistruar mesditën e së hënës duket se ka fillesat tek përplasjet e mëparshme mes dy familjeve ku i riu Johan Muçllari ka qenë shënjestër e dy sulmeve me armë të regjistruara në hotelin e tij në Gusht të 2020./Tv Klan
