Ministri i Jashtëm serb, Ivica Daçiç tha se arritja e një marrëveshjeje për çështjen e Kosovës nuk mund të nënkuptojë që Serbia të njohë pavarësinë e Kosovës në tërë territorin e saj.
“Për ne tani është e rëndësishme që të gjejmë një zgjidhje kompromisi. Kjo zgjidhje nuk mund të bëhet me detyrim, që Serbia ta njohë Kosovën si shtet të pavarur në tërë territorin e saj. Ky nuk mund të jetë kompromis”, tha Daçiç në një konferencë për media të hënën në Beograd.
Ai shtoi se Serbia nuk është kundra dialogut me Kosovën por që ky dialog të nis duhet hequr taksa 100% për mallrat serbe.
Qeveria e Kosovës, e udhëhequr nga kryeministri Ramush Haradinaj, ka thënë se taksa nuk do të hiqet derisa Serbia nuk e njeh Kosovën.
Javën e kaluar, u anullua takimi midis përfaqësuesve të të dyja vendeve, i planifikuar të mbahej më 1 korrik në Paris.
Është e paqartë nëse ky takim do të mbahet në ndonjë datë të mëvonshme, ndërkohë që normalizimi i marrëdhënieve mbetet kusht si për Kosovën, ashtu edhe për Serbinë, që të përparojnë në rrugën e integrimit evropian. /Opinion.al
