Kryetari i Bashkisë së Tiranës edhe njëherë nuk e ka fshehur vlerësimin e madh që ka për kryetarin e partisë dhe njeriun që i dha pushtet, Edi Ramën. Por kësaj radhe duket se e ka kaluar pak masën….
I ftuar në një intervistë me studentë në News 24, ai u pyet nëse ka ambicie për tu bërë kryeministër. Pyetje që merr shkas nga thashethemet në rrethet politike se Rama po përgatit Erion Veliaj për Kryetar PS-je dhe Kryeministër kur të largohet vetë.
Duket se kryetari i bashkisë më të madhe në vend nuk e fsheh entuziazmin për këtë pyetje dhe ja çfarë thotë:
“Nuk kam ambicie më të madhe. Se pari me punën fantastike që po bën Edi Rama, duhet të përgatitemi të gjithë që të drejtojë këtë model ndoshta edhe më shumë se Angela Merkel”.
Kujtojmë se Merkel ka drejtuar Gjermaninë për 3 mandate dhe tashmë ka fituar të 4-tin, ndërsa Veliaj e dëshiron Ramën akoma më shumë në pushtet pra 5 apo 6 mandate apo thënë ndryshe 20 e më shumë vite….
Më tej, Veliaj e argumenton përgjigjen: “T’i lëmë të gjithëve në pasionin e tyre. Unë dua të rikandidoj për kryetar bashkie. Nuk mendoj se gara e Bashkisë së Tiranës nuk e ka me kundërshtarin”
