Manchester City ka fituar bindshëm ndaj Steaua Bukureshitit dhe mund të konsiderohet i kualifikuar për në fazën me grupe të Champions League. Skuadra e drejtuar nga Pep Guardiola triumfoi me rezultatin 5-0 në Rumani, në një ndeshje të dominuar totalisht ku humbi dy penallti dhe goditi tre shtylla. Skuadra angleze duket qartë se i përket një niveli tjetër dhe takimi i kthimit në “Etihad Stadium” do të luhet thjesht për një formalitet. Kjo ishte fitorja e dytë për Guardiola në dy ndeshjet e para zyrtare në stolin e City.
Sergio Aguero humbi një penallti në minutën e tetë të ndeshjes, pas një fualli të pësuar nga Raheem Sterling, por vetëm pesë minuta më vonë Manchester City kaloi në avantazh, kur Sterling shërbeu për David Silva, i cili shënoi me një goditje të saktë nga brenda zonës. Në mesin e pjesës së parë, situata u bërë tragji-komike kur Aguero humbi një tjetër penallti, duke e goditur topin mbi traversë, por katër minuta para fundit të pjesës së parë, argjentinasi bëri autokritikë duke shënuar golin e dytë për City.
Pjesa e dytë filloi ashtu si e para dhe City gjeti golin e sigurisë përfundimtare kur Kevin De Bruyne nxori të vetëm përballë portierit spanjollin Nolito, i cili e dribloi numrin 1 rumun dhe shënoi me portën e boshatisur golin e tij të parë me skuadrën e re. Dhjetë minuta para fundit, si për të korrigjuar dy penalltitë e humbur në pjesën e parë, Sergio Aguero shënoi edhe golin e dytë dhe të tretë personal, duke e bërë me pesë “yje” suksesin e Manchester City, që doli nga stadiumi mes duartrokitjeve të publikut rumun pas fitores 0-5.
Në ndeshjet e tjera të luajtura për “play off” të Champions League, edhe M’Gladbach mund të konsiderohet me një këmbë në raundi tjetër pasi fitoi 1-3 në fushën e zviceranëve të Young Boys. Në Kopenhagen, vendasit fituan 1-0 ndaj APOEL Nicosia, kurse në barazim 1-1 u mbyllën Ajax-Rostov dhe Dinamo Zagreb-Salzburg. Austriakët eliminuan Partizanin në raundin e kaluar.
