Policia e Shtetit ka marrë në mbrojtje familjet e të gjithë personave të përfshirë në masakrën e Lushnjës pak ditë më parë. Deri më tani, Policia kishte marrë në mbrojtje vetëm Xhulio Shkurtin me familjen e tij.
Por, për shkak të specifikës së çështjes dhe problematikave që bart kjo ngjarje, që mund të jetë zinxhir i hakmarrjeve të bandës së Aldo Bares, është parë e arsyeshme të merren në mbrojtje edhe protagonistët e tjerë të kësaj ngjarjeje.
Kështu, sipas të dhënave të Policisë, për të shmangur ndonjë hakmarrje të mundshme mes palëve do të merren në mbrojtje familja e autorëve të dyshuar, familjet e dy viktimave, si dhe të të plagosurve.
“Do të kemi në ruajtje çdo lëvizje të familjarëve me qëllim shmangien e ndonjë hakmarrjeje tjetër të mundshme”, bënë të ditur burime nga grupi i hetimit. Të njëjtat burime pohojnë se edhe familjet e autorëve të dyshuar të këtij atentati ndihen të pasigurt. Edhe pse deri më tani nuk kanë marrë asnjë kërkesë nga ta për mbrojtje, duke gjykuar shkallën e lartë të rrezikut, blutë kanë vendosur të qëndrojnë afër familjeve të Laert Haxhiut dhe Orges Bilbilit.
Ngjarja e bujshme në Lushnjë, ku mbetën të vrarë Jurgen Hoxha dhe Zamir Latifi, si dhe u plagosën dy të tjerë, është kthyer tanimë në çështjen më të debatuar edhe brenda radhëve të Policisë së këtij rrethi. Burime konfidenciale tregojnë se në Lushnjë, pas akuzës nga opinion publik ndaj policisë për mosveprim, këta të fundit kanë rritur presionin ndaj “të vegjëlve” të tyre.
Policë të rendit dhe inspektorë të zonave kanë marrë detyra në ditët e fundit për të vlerësuar çdo informacion në rrugë operative dhe për të raportuar tek eprorët e tyre. Dy ditë më parë, banorët akuzuan policinë për mosveprim. Ata theksuan se gjeografia e qytetit të Lushnjës është shumë e vogël.
“Tri rrugë ka Lushnja. Këtu qytetarët e njohin njëri-tjetrin. Policia është inekzistente përballë krimit, ndryshe do t’i kishte kapur ata që ishin në kërkim dhe bridhnin lirshëm dhe të armatosur nëpër rrugë”, theksuan qytetarë të Lushnjës.
Ngjarja e ditëve të fundit ka irrituar shumë prej tyre, duke u rikthyer në memorie vitet e përgjakshme të 97-s, ku bandat bënë kërdinë duke ekzekutuar njëra-tjetrën deri edhe me shëtitje të kokës së prerë të kufomës në mes të qytetit.
Burimi: Panorama
