Përpara se të niste konferenca Saimir Tahiri, u fotografua i buzëqeshur teksa takonte disa kalimtarë të rastit. Më pas një ndryshim total. Gjuha e trupit e ish ministrit të Brendshëm tregonte se ai ishte hedhur në sulm, ku nuk munguan as momentet që drejtonte gishtin tregues tek “ata”.
Teksa theksoi se është i vetëm përpara drejtësisë dhe mohoi se ka mesazhe të koduara, duket se vetë përgjigjet e dhëna nga ish ministri tregojnë të kundërtën.
Shumë prej deklaratave duket se shënjestronin kryetarin e partisë, Edi Ramën, por edhe disa nga ata që janë konsideruar gjithnjë si rivalët e tij brenda socialistëve, Fatmir Xhafajn apo Erion Veliajn.
Saimir Tahiri: “Ka tjetër ekip me “like” and “share”, mua nuk më interesojnë këto dhe dua të kem përgjigje vetëm për të drejtën time. Nuk dua të abuzoj, por e di shumë mirë kë kam rrotull”.
Saimir Tahiri: “Kam marrë mesazhe nga ish-kolegët (e PS). Komunikoj me disa, nuk komunikoj me disa të tjerë që nuk i njoh fare. I falënderoj të gjithë ata që më kanë shkruar dhe ende nuk kam patur mundësi tu përgjigjem”.
Saimir Tahiri: “Nuk e di pse e kuptoni dhe rikthimin e shihni vetëm në Qeveri apo qeverisje. Nuk e kam menduar këtë çështje tani. Se çfarë do të bëjë me jetën dhe karrierën time, nuk e ka në dorë as partia dhe as kushdo individ brenda asaj partie”.
Saimir Tahiri: “Më vlen më shumë drejtësia sesa partia. Më keni trembur sa herë më keni pyetur “a do bëhesh kurban?”, dhe më keni fyer. Kurban nuk do të thotë të shkosh në burg, por të mos jesh i lirë. Në Parlament dhe politikë ka njerëz kurban sepse kanë frikë të flasin. Ka kurban sa të duash sot nga ata që qeverisin. Ata janë kurban, unë jo”.
Saimir Tahiri për ambasadën amerikane: “Dekurajuese edhe për mua që i dëgjova ato deklarata. E theksoj në kulturën time nuk flitet për një vendim gjykate, për më tepër për një vendim që nuk është zbardhur akoma. Nuk është në kulturën time të flas për vendimin e gjykatave, e nuk e besoj ndodh dhe në Amerikë që një ambasadë flet për vendimin e gjykatave, e nuk e besoj që të ekzistojë një presion mbi gjykatat më i madh se ky”.
Prokuroria kërkoi javën e shkuar dënimin prej 12 vitesh burgim, duke e akuzuar ish ministrin për të paktën tre vepra të rënda: Trafik i narkotikëve kryer në bashkëpunim në formën e grupit të struktuar kriminal; Pjesëmarrje në grup të strukturuar kriminal dhe Kryerja e veprës në grup të strukturuar kriminal.
Por gjykata i rrëzoi ato, duke vlerësuar se nuk kishte prova që të mbështesnin këto akuza, por se megjithatë, ishin sipas saj të mjaftueshme për ta dënuar zotin Tahiri për shpërdorim detyre./ Opinion.al
