“Ne nuk hedhim asnjë hap pas, e sotmja është dita e fundit që ju drejtohem me argumentet e arsyes sepse koha për fjalët po mbaron dhe në protestën e ardhshme fjalën do ta ketë vetëm sovrani, vetëm populli. E gjithë bota e di se ky është pushtet i marrë me dhunën e krimit dhe që mbrohet me dhunën e krimit. Ne nuk pranojmë pushtet të marrë me dhunë. Harrojeni se do ta mbani, kthejani sovranit atë që i keni vjedhur”.
Me këto fjalë e mbylli protestën e shtatë kombëtare kreu i opozitës Lulzim Basha, një protestë e cila fillimisht nisi e paqtë por më pas nuk munguan tensionet dhe përplasjet.
Përpara Kryeministrisë, stacioni i parë i protestës opozitarët ishin përpjekur edhe për dekorin ku spikatën tullumbacet e bardha, në të cilat shkruhej “IK” si dhe yjet e flamurit të Bashkimit Europian.
Fjalimi i Lulzim Bashës përpara Kryeministrisë ishte i mbushur me akuzat e forta ndaj qeverisë, për korrupsion, lidhje me krimin dhe vjedhje të zgjedhjeve. Një lumë tymueses dhe shashkash u hodhën drejt kordonit të policisë, ndërsa përpjekja e një grupi mbështetësish për të çarë kordonin e policisë, u ndërpre nga ndërhyrja e zotit Basha dhe eksponentëve të Partisë demokratike të cilët kërkuan të mbanin distancën nga rreshtimi i policisë.
Protestuesit u mblodhën më pas para godinës së Parlamentit, në përgjigje të thirrjes së kryetarit demokrat. Policia vendosi t’i përgjigjet me gaz lotsjellës dhe ujëhedhëse, mbështetësve të opozitës që për dhjetëra minuta lëshuan pa ndërprerje shashka, flakadanë dhe fishekzjarrë drejt hyrjes së godinës, në brendësi të së cilës qëndronin të rreshtuar forcat speciale të Policie. Zona para hyrjes së selisë së Parlamentit i ngjante një fushëbeteje.
Ministri i Brendshëm Sandër Lleshaj, përmes një statusi në Twitter njoftoi për disa efektivë të plagosur, ndërsa po ashtu ka dhe dhjetëra protestues të lënduar. Opozita kërkon me ngulm largimin e kryeministrit Edi Rama dhe krijimin e një Qeverie kalimtare të përgatisë vendin për zgjedhje të parakohshme. Ajo përfundimisht refuzoi pjesëmarrjen në zgjedhjet vendore të 30 Qershorit, duke kërcënuar se nuk do të lejojë mbajtjen e tyre.
Pavarësisht së në mënyrë të përsëritur, përfaqësuesit e komunitetit ndërkombëtar, i kanë mëshuar nevojës së dialogut, ndërsa janë dënuar me forcë aktet e dhunës në protesta, nuk ka patur asnjë shenjë të afrimit të pozicioneve të palëve.
Kryeministri ka mohuar në mënyrë kategorike dorëheqjen, apo dhe mundësinë e shtyrjes së zgjedhjeve vendore. Për opozitën, çdo zgjidhje duhet të kalojë në mënyrë të pashmangshme përmes largimit të Ramës nga drejtimi i qeverisë.
REAGIMET
SHBA: Ambasada e SHBA dënon dhunën që ndodhi gjatë protestës sonte. Grumbullimi paqësor dhe e drejta për të shprehur pakënaqësitë ndaj qeverisë janë shtylla të demokracive të shëndosha, por janë të drejta që duhen ushtruar paqësisht. Përdorimi i mjeteve piroteknike, sidomos kur vënë në shënjestër policinë, nuk është akt paqësor, është i papranueshëm dhe jodemokratik. Iu bëjmë thirrje të gjithë organizatorëve të protestës të ndalojnë aktet e dhunshme dhe të angazhohen në dialog konstruktiv.
Ambasada e Britanisë së Madhe: Mbretëria e Bashkuar mbështet të drejtën për të protestuar paqësisht. Nuk ka vend për dhunë dhe objekte shpërthyese në një protestë paqësore. Liderët e protestës kanë përgjegjësinë për të mbajtur demonstratë ligjore, kurse policia ka përgjegjësinë proporcionale për të garantuar ruajtjen e rendit publik. Për të mirën e kujtdo, duhet të ketë protestë paqësore dhe të sigurtë./ Opinion.al
