TIRANE– Biznesi fitimprurës i naftës kalon me sa duket në disa kanale të errëta derisa lulëzon… Duke u përpjekur të hedhin pak dritë mbi atë që gëlon në këto kanale kemi botuar dje dy raste të kompanive të naftës që lënë për të dyshuar për mënyrën se si kanë konkuruar në treg. Sot botojmë rastin e tretë, jo më pak interesant.
Bëhet fjalë për kompaninë e naftës TPD-Trading Petrol & Drilling. Kjo kompani është krijuar në vitin 2012. Vit i mbrapsht ky, pasi kompania rezulton të ketë dalë me humbje.
Por çfarë ndodhi me TPD Trading Petrol një vit më pas, në 2013-ën, kur u ndryshua edhe qeveria?
Sipas të dhënave në QKR, kompania bëri kthesën në 2013 duke dalë me fitim në vlerën e 95 mln lekëve. E gjitha kjo sepse kjo kompani në shtator të vitit 2013 ka nënshkruar një marrëveshje me ARMO-n dhe operon në rafineritë e Fierit me një kapacitet përpunimi 500 mijë ton/vit.
Për vitin 2014 sipas të dhënave nga Open Data që bazohet në të dhënat e QKR, kjo komapnia bëhet lider e shton xhiron vjetore me plot 16.5 miliardë lekë. Nëse bëjmë një krahasim të thjeshtë mes 2013 e 2014 shohim se TPD Trading Petrol ka rritur xhiron vjetore 440%. Mbresëlënëse kjo!
Por kush është pronari i kësaj kompanie?
Pronari i kësaj kompanie është Pajtim Braçaj. Biznesmeni i arit të zi që ndodhet në burg prej muajit tetor. Ai u arrestua me 2 biznesmenë dhe 5 persona të tjerë për trafik droge. Në një vilë në ish-kënetën e Durrësit atyre ju sekuestruan 700 kg kanabis.
Mes të arrestuarve është edhe Ajet Sulo vëllai i Besnik Sulos ose siç njihet ndryshe Beso i Tajvanit.
Bracaj ka lidhur nje kontrate fitimprurese me ARMO-n, nje pjese e aksione te se ciles jane shteterore.
