Rusia e konsideron situatën në Kosovë “jashtëzakonisht të vështirë, të tensionuar dhe potencialisht të rrezikshme”. Kështu tha zëdhënësi i Kremlinit, Dmitry Peskov, në një reagim zyrtar lidhur me sulmin terrorist në fshatin e Banjskës, por duke mos e dënuar atë.
Zëdhënësi i Putinit, iu referua Kosovës si “provincë jugore serbe”, ndërsa mbajti të njëjtin qëndrim me presidentin Vuçiç, me pretendimin se serbët atje po shënjestrohen vazhdimisht.
“Në frontin e Kosovës, ne shohim një qëndrim mjaft të vendosur jo objektiv ndaj serbëve. Është një linjë tradicionalisht e pabalancuar. Fakti që shumë shpesh organizohen provokime të ndryshme kundër serbëve nuk është sekret për askënd. Sigurisht që në sfondin e këtyre provokimeve gjithmonë ka zhurmë”, tha zëdhënësi i Kremlinit
Peskov shtoi më tej se Rusia po ndjek me kujdes të gjitha zhvillimet, jo vetëm lidhur me sulmin, por edhe reagimet pasuese. Kjo deklaratë nga aleati historik i Serbisë, erdhi pasi presidenti Vuçiç takoi ambasadorin rus në Beograd, Aleksandër Boçan-Harçenko.
“Jam mirënjohës që ambasadori rus i dëgjoi lutjet dhe kërkesat e palës serbe. E njoftova Boçan-Harçenkon se në Kosovë dhe Metohi po kryhet spastrim etnik brutal i organizuar nga Albin Kurti me mbështetjen e një pjese të bashkësisë ndërkombëtare”
Gjatë të dielës në mbrëmje, Vuçiç mbajti një konferencë për shtyp, të cilën e përdori për të fajësuar kryeministrin e Kosovës Albin Kurti, me pretendimin se ajo që ndodhi ishte rebelim ndaj tij. “Mund të na vrisni të gjithëve, por kurrë nuk do ta njohim pavarësinë e Kosovës”, u shpreh presidenti serb duke akuzuar sërish Kurtin se dëshira e tij e vetme është që të çojë në konflikt Serbinë me NATO-n.
