Ushtria amerikane njoftoi se numri i ushtarëve amerikanë që kanë pësuar dëmtime traumatike në tru, për shkak të sulmeve të Iranit në një bazë ushtarake në Irak, është rritur.
Nënkoloneli, Thomas Campbell, tha se 16 anëtarë të tjerë u diagnostikuan me dëmtime në tru, duke e çuar kështu numrin në 50-të.
Fillimisht, Presidenti Donald Trump pretendoi se asnjë amerikan nuk u dëmtua në sulmin e Iranit në bazën ajrore të Ain al-Asad në Irakun perëndimor.
Ai minimizoi pasojat duke thënë se “kam dëgjuar se ata kishin dhimbje koke dhe disa gjëra të tjera”. Deklaratat zemëruan një grup të veteranëve të luftës në SHBA.
William Schmitz, komandanti kombëtar i Veteranëve të Luftërave të Huaja, tha se grupi “pret një falje nga Presidenti për burrat dhe gratë e shërbimit tonë për shkak të fjalëve të tij të gabuara”.
Sulmi i Iranit ndaj bazave amerikane erdhi si hakmarrje për vrasjen e komandantit të lartë ushtarak, Qasem Soleimani, nga ana e Shteteve të Bashkuara më 3 janar.
Gjatë sulmit në bazën ushtarake ndodheshin rreth 1.500 ushtarë amerikanë./Opinion.al
