Presidenti, Bajram Begaj, ka dhënë një intervistë për “Zërin e Amerikës” teksa ndodhet në New York në kuadër të Asamblesë së Përgjithshme të OKB, ku është pyetur për një sërë çështjesh.
Një ndër to është edhe çështja e kryebashkiakut të zgjedhur të Himarës. Fredi Beleri.
Begaj vlerësoi marrëdhëniet me Greqinë, por theksoi se sa i përket këtij rasti, i duhet lënë drejtësisë që të bëjë punën e vet.
“Marrëdhëniet e Shqipërisë dhe Greqisë janë marrëdhënie të një partneriteti strategjik dhe kuptohet që bazohet në vlerat më të mira të fqinjësisë dhe të respektit reciprok për njëri-tjetrin. Unë kam pritur në zyrën time kryeministrin e Greqisë. Kemi diskutuar hapur për çështje të reja dhe të vjetra. Natyrisht kjo çështje që ju përmendët është një çështje që nuk është në dorën e Presidentit, as të ndonjë personaliteti tjetër. Mendoj se kjo çështje ka lidhje me drejtësinë dhe duhet ta lemë drejtësinë të bëjë punën e vet. Kur të flasë drejtësia pastaj mund të veprojmë”, tha Begaj sipas të cilit, drejtësia në Shqipëri pas reformës është “në rrugën e duhur dhe e pavarur”,
Një tjetër pyetje për Begajn kishte të bënte edhe me marrëveshjen për kufirin detar me Greqinë. Prej disa muajsh ai ka deklaruar se po shqyrton kërkesën.
“Vlerësimi i kërkesës së bërë nga MEPJ nuk është çështje kohe. Vlerësimi duhet bërë bazuar tek disa kërkesa ligjore dhe kushtetuese që duhet të përmbajë autorizimi në fjalë. Presidenti e ka detyrim kushtetues ta përmbushë këtë detyrim ligjor dhe kushtetues për çdo negociatë, për çdo marrëveshje ndërkombëtare. Në momentin që do të bëj vendimmarrjen e duhur do t’ju bëj me dije dhe publikut dhe ju”, tha kreu i shtetit.
Begaj tha se është ngritur një grup ekspertësh “për të arritur në një version të autorizimit në përputhje të plotë me vendimin e Gjykatës Kushtetuese”.
