Dy persona janë plagosur me armë zjarri të hënën pasdite në qytetin e Cërrikut. Ngjarja ka ndodhur rreth orës 18:00 në vendin e quajtur “Kryqëzimi i Yllit”.
Policia tha se ka mbetur i plagosur me armë zjarri në këmbë shtetasi G.K.,20 vjeç, banues në fshatin Malasen Cerrik, si dhe është plagosur lehtë në dorë shtetasi J.R.,22 vjeç, banues në Cerrik.
Të plagosurit ndodhen në spitalin kirurgjik Elbasan, jashtë rrezikut për jetën.
Të njëjtat burime thanë se është identifikuar autori i plagosjes, ndërsa është arrestuar drejtuesi i mjetit Angjelo Zhelegu i cili ka larguar autorin dhe bashkëpunëtorin e tij nga vendngjarja.
Ngjarja
Sipas policisë, dyshohet se shtetasi B.H së bashku me shtetasin I.F, po udhëtonin me një automjet tip Golf që drejtohej nga shtetasi A. Zh.
Mësohet se shtetasi B.H, ka parë shtetasin G.K me të cilin kishte një konflikt të mëparshëm për motive të dobëta ka zbritur nga automjeti dhe është konfliktuar fizikisht me të.
Policia thotë se në konflikt është përfshirë edhe shtetasi J.R, shoku i shtetasit G.K, si dhe dy shokët e shtetasit B.H, shtetasit A.Zh dhe I.F.
Më tej, në konflikt e sipër, dyshohet se shtetasi B.H, ka qëlluar me armë zjarri pistoletë në drejtim të shtetasit G.K, i cili është plagosur në këmbë, si dhe është plagosur në dorë shoku i tij shtetasi J.R.
Bëhet me dije se forca të shumta të Policisë së Elbasanit, janë vënë në ndjekje të autorit dhe bashkëpuntorit tjetër dhe ku vijon ndjekja për kapjen e tyre.
