Holanda mbetet një nga vendet skeptike për çeljen e negociatave për anëtarësim të Shqipërisë me Bashkimin Europian. Në qershor qeveria holandeze u shpreh kundër çeljes së negociatave ndërkohë që disa javë më parë parlamenti kishte dërguar një kërkesë për kthimin e regjimit të vizave me Shqipërinë e cila u refuzua nga Komsioni Europian.
Megjithatë, çelja e negociatave është një vendim që duhet marrë unanim nga të gjitha vendet në Këshillin Europian në datë 18 tetor. Më datë 4 tetor, qeveria e Holandës do ti drejtojë zyrtarisht parlamentit një letër në lidhje me procesin e hapjes së negociatave për anëtarësim me Shqipërinë. Parlamenti më pas do të marrë vendimin më 8 tetor.
Mbrëmjen e 26 shtatorit, Bundestagu gjerman vendosi që në parim Shqipërisë ti çelen negociatat pas përmbushjes së 9 kushteve. Vendimi i tij u parapri edhe nga një qasje pozitive për procesin nga ana e qeverisë federale. Por në rastin e Holandës, nuk duket të kemi të njëjtën situatë.
Më datë 16 Shtator, Ministri i Jashtëm holandez, Stef Blok gjatë raportimit në komisionin parlamentar për çështjet evropiane tha se Shqipëria ende nuk ka përmbushur kushtet e përcaktuara nga Këshilli në vitin 2018.
“ Shqipëria është me të vërtetë një rast tjetër. Ekziston edhe një mocion i miratuar nga parlamenti ynë në lidhje me Shqipërinë. Shqipëria do të fillojë negociatat sapo të plotësojë kriteret e përcaktuara nga Këshilli Evropian në vitin 2018. Ky nuk është ende rasti. Herën e fundit që Këshilli vendosi zyrtarisht për këtë, më shumë se një vit më parë, ne, Franca dhe Danimarka kishin këtë pozicion dhe nuk kam indikacione se ka ndryshuar diçka qe nga ajo kohë” tha ndër të tjera Blok.
Ndërsa deputeti që propozoi mocionin e miratuar nga parlamenti Pieter Omtzigt, tha se vërente hapa prapa në lidhje me Shqipërinë.
“Unë dëgjova zonjën Mogherini se ka pasur disa zhvillime pozitive në Shqipëri gjatë muajve të fundit. Me gjithë ndershmëri: Shpresoj t’i shoh, por me të vërtetë atje flitet për përfshirjen e mafias në partinë në pushtet, ka patur një bojkot të plotë te opozitës ne zgjedhjet lokale dhe ka probleme të mëdha me kriminalitetin dhe trafikun e drogës. Kam një ndjenjë të sinqertë që ata janë duke lëvizur prapa në krahasim me atë ku ishin një vit me pare”.
Do të mjaftonte kundërshtimi i një shteti të vetëm, ne këtë rast Holanda që negociatat për anëtarësimin e Shqipërisë në BE të mos hapen me 18 Tetor duke pritur qe kushtet e vena një vit me pare te plotësohen” tha ai në mbledhjen e 16 shtatorit.
Përveç Holandës ende mbetet për tu mësuar qëndrimi i Francës në lidhje me çeljen e negociatave me Shqipërinë pasi dihet se Parisi zyrtar është një nga vendet kryesore skeptike lidhur me politikën e zgjerimit. /Opinion.al
