Kryekomisioneri Iirjan Celibashi tha se dokumentacioni i paraqitur nga grupi i Enkelejd Alibejat për regjistrimin e PD-së në KQZ, nuk është i plotë.
Kështu ai nuk ka regjistruar PD në zgjedhje por i ka dhënë 48 orë kohë Lulzim Bashës, që figuron kryetar sipas regjistrimit të partisë në gjykatë që të plotësojë dokumentacionin.
“Do duhej që sipas ligjit kërkesa të paraqitej nga kryetari i PD, zoti Basha. Ligji njeh të drejtën, jo vetëm Kodi Zgjedhor, por edhe legjislacioni tjetër, njeh të drejtën që disa kompetenca të kryetarit t’i delegojë tek persona të tretë. Në vlerësim të dokumentit autorizues të dhënë nga zoti Basha për zotin Sefa dhe për të tjerë, vlerësoj se ky dokumentacion nuk është i plotë dhe në përputhje të plotë me parashikimet e Kodit Zgjedhor. Sipas vlerësimit tim në përputhje me këtë parashikim të Kodit Zgjedhor duhet që akti autorizues të jetë i qartë. Do të thotë që kush e lëshon autorizimin duhet të jetë i qartë dhe veprimet që lëshon i autorizuari të jenë të qarta.
Vijmë tek komponenti i tretë i qartësisë së veprimeve që duhet të kryejë i autorizuari. Qartësia nuk është e plotë. Ju jeni autorizuar që të kryeni regjistrimin e PD në zgjedhjet e vitit 2023. Ju thoni që kjo është mjaftueshëm e qartë. Duhet të jetë plotësisht e qartë dhe kjo do të thotë se nuk ka mënyrë tjetër pak më të qartë se kjo që është e qartë. Kjo do të thotë që nga pikëpamja të paktën formale autorizimit i mungon qartësia.
Përtej kësaj ka edhe një mangësi tjetër në dokumentacionin tuaj, mangësi që lidhet me detyrimet dhe përgjegjësitë personale të kryetarit të PD për të nënshkruar deklaratën. Po të themi që çdo kompetencë e kryetarit mund të delegohet tek të tretë dhe të themi që ju e keni. Deklarata e kryetarit të partisë nuk është kompetencë, është përgjegjësi dhe si përgjegjësi ajo nuk mund të delegohet. Detyrimi i dikujt për të kryer shërbimin ushtarak nuk mund të delegohet. Mora një shembull popullor për të qenë i qartë me analogjinë që solla. Kjo është përgjegjësi personale dhe jo më kot ligjvënësi e ka përcaktuar si përgjegjësi dhe jo si kompetencë. Kompetenca mund të delegohet, përgjegjësia jo. Ndaj duke e konkluduar gjithë këtë arsyetim dhe duke analizuar të gjitha këto premisa përfshi edhe ato të narrativës së zotit Nure, unë vlerësoj që dokumentacioni i paraqitur nga përfaqësuesi i kryetarit të PD, zoti Lulzim Basha, ku kërkohet regjistrimi i partisë si subjekt zgjedhor, nuk është i plotë për arsyet që thashë. Do ju jap 48 orë kohë për t’i bërë plotësimet e kërkuara, domosdoshmërisht për deklaratën e kryetarit të partisë politike. Faleminderit e mbyllëm këtë pikë të rendit të ditës”-tha Celibashi.
