Serbia kërkon organizimin e një sesioni urgjent të Këshillit të Sigurimit të Kombeve të Bashkuara. Këtë e njoftoi presidenti Aleksandër Vuçiç, gjatë një konference për media në Beograd, ndërsa pretendoi se në Kosovë po bëhet spastrim etnik i heshtur në dëm të serbëve. Me këtë qëndrim në mendje, tha se do ketë dhe një takim urgjent edhe me sekretarin e përgjithshëm të NATO-s, Jens Stoltenberg, për të denoncuar atë që e quajti “një sulm të Kurtit ndaj popullatës serbe në Kosovë”.
“Aksioni i vrasjeve, persekutimit dhe spastrimit etnik i kryer nga regjimi i Prishtinës kundër popullit serb në Kosovë dhe Metohi është i organizuar dhe planifikuar mirë dhe i mbështetur në thelb nga qarqe të caktuara në bashkësinë ndërkombëtare. Ata morën një vendim që serbët më të zëshëm, që mund të jenë pikë e rezistencës ndaj Prishtinës, të arrestohen, të vriten ose të largohen nga Kosova e Metohia. Ai aksion filloi në Shtrëpc në vitin 2021”, tha Vuçiç.
Vuçiç sqaroi se në seancën urgjente të Këshillit të Sigurimit të OKB-së, nëse do të zhvillohet, do të kërkojë lëshimin e një urdhri ndaj KFOR-it që të përmbushë detyrimet e përcaktuara me nenet 9, 15, 3 dhe 4 të Rezolutës 1244. Presidenti serb shtoi se në arenën ndërkombëtare do të kërkojë “parandalimin e çdo veprimi të mëtejshëm nga strukturat e sigurisë të Kosovës që kërcënon jetën, lirinë, sigurinë dhe mbijetesën e serbëve në Kosovë, duke kryer çmilitarizimin e të gjitha formacioneve të armatosura të shqiptarëve”. Por në pikat e përmendura nga Vuçiç të Rezolutës 1244, përcaktohet edhe dërgimi i një formacioni të ushtrisë dhe forcave speciale të Serbisë në Kosovë.
“Anëtarëve të BE-së dhe SHBA-ve do tua përsëris se ne do të përmbushim gjithçka, por presim që të formohet Asociacionin, të shohim lirimin e të gjithë të arrestuarve. Regjimi i Prishtinës gjeti arsye të mjaftueshme për të arrestuar çdo serb. Është thirrja më e drejtpërdrejtë dhe brutale për spastrim etnik. Ne jemi të gatshëm të vazhdojmë bisedimet, por është e qartë se gjërat kanë dalë jashtë kontrollit.”
Vuçiç konfirmoi se do ta shqyrtojë kërkesën e Listës Serbe, për shpalljen e njësive speciale të policisë së Kosovës si organizatë terroriste. Gjithashtu njoftoi nisjen e një hetimi ndaj deputetes britanike, Alicia Kearns, që deklaroi se Serbia po kontrabandon armë në Kosovë me ambulance dhe se ato magazinohen në objektet e Kishave Ortodokse.
