Kryeministri Rama mbajti sot një bashkëbisedim në Facebook ku njoftoi rreth masave të reja që priten të merren në lidhje me krizën e koronavirusit si dhe i ktheu përgjigje pyetjeve të disa qytetarëve.
Megjithatë në disa momente kryeministri humbi qetësinë prej pyetjeve të qytetarëve.
“Është një soj i posaçëm, fatmirësisht në pakicë, shqipoje që i di të gjitha sepse nuk di asgjë. Me këtë soj shmanguni sa më shumë sepse unë nuk shmangem dot sepse kam për detyrë t’i mbroj në këtë situatë dhe të mundohem sa të mundem t’ju hap ndonjë të çarë që të hyjë pak dritë pavarësisht se nuk hanë pykë fare”, tha ai para se t’i përgjigjej një qytetari.
Lidhur me komentet se ka njerëz që po vdesin për bukë në këtë kohë të vështirë Rama tha se nuk ka asnjë rast të tillë që nga koha e Skënderbeut.
“Ngelët bukë, bukë, bukë, nuk ka një rast që ka vdekur për bukë që nga koha e Skënderbeut. Nuk ka, kush di le të ma thotë”.
Por ajo që e bëri të humbte edhe më shumë qetësinë kryeministrin ishte një pyetja “ça të duket vetja ty?” të cilën ai e zgjodhi ta lexonte në fund.
“Ça më duket vetja mua? Mua vetja më duket as më shumë e as më pak po mbrojtësi i jetës tënde sot, shërbëtori yt sado që ti je shëmbëlltyra më kuptimplotë e shprehjes nuk ka pyll pa derra dhe sado që pylli i jonë si cdo pyll tjetër ka derrin e vet kjo nuk ka rëndësi se ti je për vetë ndërsa unë jam i gjithi për të mbrojtur ty jetën. Ti nuk e kupton sot mos e kuptofsh kurrë. Me këtë mendje që ke ti je një bombë në shtëpi por ajo që unë mund të bëj është që bombën tënde përsa i përket kësaj vdekjeje që vjen vërdallë mbi kokat e shqiptarëve ta cmontojmë komplet pastaj ty si bombë në vetvete duhet të të cmontojë nëse do të ketë fat familja jote”, tha Rama. /Opinion.al
