“Në demokraci zgjedhjet janë garë vlerash dhe jo të fortësh”. Kështu thekson ish ministri i Jashtëm, Ditmir Bushati, në mesazhin e urimit për fituesit e zgjedhjeve në Kosovë.
“Partitë politike i nënshtrohen konfirmimit të vendimeve nga populli, ku qytetarët kanë mundësi të rendisin të preferuarit e tyre në listat e kandidatëve për deputetë, çka forcon kontrollin demokratik ndaj vendimmarrjes”, thekson Bushati, një mesazh ky dhe për shefin e partisë së tij, Edi Ramën, që prej kohësh marrëdhëniet mes tyre janë “ftohur”.
Bushati ka qenë kritik në PS, në lidhje me kandidimin e Valdrin Pjetrit në Shkodër, i cili më pas u zbulua se kish fshehur dënimin në Itali.
Por edhe më tej Bushati ka qenë kundër një bashkëpunimi mes PS-së në Shkodër dhe deputetit Tom Doshi.
Në një intervistë pak ditë më parë për Zërin e Amerikës, Ditmir Bushati tha se është i nevojshëm një “kordon sanitar” apo filtra të rreptë për të parandaluar kandidimin e personave me të kaluar të dyshimtë./ Opinion.al
