Gjatë muajve korrik dhe gusht, bulevardi Epidamn në Durrës do të kthehet në zonë pedonale.
Ndalohet lëvizja dhe parkimi i automjeteve në mbrëmje, në një hark kohor prej 5 orësh.
“Nga dita e sotme, pra nga data 1 korrik deri më 31 gusht 2025, nga ora 18:00 deri në orën 23:00, ky bulevard do të jetë i bllokuar, i ndaluar qarkullimi dhe parkimi i të dyjave anëve për mjetet. Do të jetë një pedonale për mjetet për turistët dhe qytetarët e Durrësit,” tha Ervis Quku nga Policia Bashkiake Durrës.
Autoritetet kanë marrë edhe masa të tjera për të përballuar fluksin e turistëve në qytetin bregdetar.
“Turizmi sa vjen e shtohet në qytetin tonë. Ne i kemi të gjitha masat që ky sezon turistik të jetë sa më i mirë për turistët dhe të gjithë qytetarët e Durrësit”, shtoi ai.
Gjatë këtyre muajve, bulevardi nuk do të shërbejë vetëm për ecje, por aty do të zhvillohen edhe një sërë aktivitetesh që do t’i japin më shumë gjallëri Durrësit.
Klan News
