Disa orë pasi militantët e grupit palestinez Hamas kanë kryer sulme në jug të Izraelit, më 7 tetor, një bankë e re e nëntokësore gjaku, i është përveshur punës.
Punëtorët i kanë bartur pajisjet në një bunker nëntokësor dhe kanë nisur të shpëtojnë jetë. Qendra për Shërbime të Gjakut Marcus në Ramlla, afër Tel Avivit, ishte planifikuar të hapej brenda ditësh, mirëpo kur më shumë se 1.400 njerëz janë vrarë në Izrael nga sulmet e Hamasit, planifikimet kanë ndryshuar.
“Është bërë shumë e qartë që duhet të veprojmë sipas planit të luftës, sepse ashtu ka qenë momenti”, ka thënë mjekja Eilat Shinar, drejtore e divizionit Magen David Adom, shërbimit izraelit për emergjenca mjekësore, sëmundje dhe ambulancë.
E ndërtuar 15 metra nën tokë, kjo qendër në vlerë të 135 milionë eurove është e mbrojtur prej raketave, sulmeve kimike dhe tërmeteve, për të siguruar se gjaku do të jetë gati kur të ketë më së shumti nevojë për të. Shiner ka thënë se qendra ka dhuruar dhjetëra mijëra doza gjaku në ditët e para pas sulmeve të Hamasit.
“Ne kemi punuar shumë për ta furnizuar me gjak secilin që ka pasur nevojë. Ne kemi pasur shumë të plagosur dhe na është dashur t’i trajtojmë”.
Banka paraprake e gjakut, e cila është ndërtuar në vitet ’80, nuk ka pasur kapacitet që t’i përmbushë nevojat në periudha lufte dhe është ekspozuar – ndonëse jo dëmtuar – në konfliktet paraprake, ka thënë qendra. Pas luftës së tretë të Izraelit kundër Hamasit, më 2014, kur raketat kanë arritur në Tel Aviv dhe qytete tjera të mëdha, diskutimet kanë nisur për nevojën e krijimit të një qendre më të sigurt.
Qendra e re ka kapacitet për të ruajtur pothuajse dyfishin e sasisë së gjakut të qendrës paraprake – gjysmë milioni doza në krahasim me 270.000 – dhe ka procesuar më shumë gjak sesa që është ruajtur ndonjëherë në rezervat izraelite.
“E kemi kuptuar që pasi raketat janë nisur shumë afër qendrës, çdo pjesë tjetër mund të shënjestrohet”, ka thënë Moshe Noyovich, inxhinier i projektit dhe përfaqësues në Izrael për Miqtë Amerikanë të Magen David Adom, që e ka financuar së pari qendrën.
Në të kaluarën, secilën herë që raketat janë nisur drejt Izraelit, ekipi i ka bartur pajisjet në bunker për të vazhduar punën. Tani ata punojnë pa u penguar, ka thënë ai. Qendra e re 51.000 metra katrorë proceson gjithë gjakun e dhuruar në Izrael.
Ajo e ka qendrën transportuese, një laborator molekular, sistemin e filtrimit të ajrit që i mundëson stafit të punojë edhe në rast të ndonjë lufte kimike apo biologjike, dhe një dhomë të sigurt 300 metra katrorë, e cila mbron kundër kërcënimeve më të rrezikshme me raketa. Izraeli është zotuar se do ta shkatërrojë Hamasin në Gazë.
Hamasi, grupi militant islamik, ka bërë thirrje për shkatërrim të Izraelit. Teksa ushtria izraelite avancon më thellë në Rripin e Gazës, qendra është duke u përgatitur për rritje të numrit të viktimave që mund të kenë nevojë për transfuzion. Prej nisjes së luftës, mijëra njerëz kanë pritur me orë në rend për të dhuruar gjak. Në fillim të tetorit, qendra i ka pranuar 5.000 doza gjaku brenda ditës – pesë herë më shumë sesa zakonisht, kanë thënë pjesëtarë të stafit.
Dhuruesit idealë të gjakut janë ata me grupin O, i cili mund t’iu dhurohet të gjithë njerëzve edhe me grupe tjera gjaku. Sapo të dhurohet, gjaku transferohet në spitale dhe i jepet ushtrisë izraelite për t’i trajtuar ushtarët e plagosur në fushëbetejë.
“Përgjatë luftës, gjaku është pjesë e procesit të ringjalljes dhe ideja është që të kemi rezerva, të mund të dhurojmë gjak sapo të kërkohet”, ka thënë Guillemette Thomas, nga organizata ndërkombëtare Mjekët pa Kufij. /REL
