Zëvendëskryeministri Erion Braçe ka reaguar sot në lidhje me përgjimet e publikuara nga gazeta ‘Bild’. Ai thotë se Partia Socialiste nuk i ka fituar zgjedhjet duke blerë vota, por sepse ajo është një parti e fortë që ka mbështetjen e njerëzve.
Braçe i bën thirrje prokurorisë që të hetojë këtë çështje pikërisht tani edhe pse ajo ka rreth 2 vjet që ndodhet në sirtarët e prokurorisë. Megjithatë ai nuk nguron ti cilësojë shpifje banale dhe prodhime të “analizës dhe jo fakteve” përgjimet që kanë dalë nga prokuroria.
Zëvendëskryeministri thekson se Partia Socialiste nuk mund të shantazhohet dhe se kohës e kulturës së pandëshkueshmërisë së deputetëve të korruptuar i ka ardhur fundi.
Ky mesazh i fundit i zotit Braçe mund ti drejtohet edhe një pjese të kolegëve të tij në parti pasi nga përgjimet e fundit të dala nga gazeta ‘Bild’ është faktuar se disa funksionarë të lartë PS kanë qenë në komunikim me persona të inkriminuar dhe gjithashtu kanë diskutuar çmime dhe deklarime votash. /Opinion.al
