Et’hem Brahimajn e qëllova për vdekje me çifte, sepse do të spërkaste rrushin dhe do të më helmonte dhitë”. Kështu ka deklaruar 53-vjeçari Sokrat Xhuveli nga Borshi i Himarës, i cili dy ditë më parë vrau fqinjin e tij 78-vjeçar, Et’hem Brahimaj. Gjatë marrjes në pyetje nga policia e Vlorës, autori i krimit ka pohuar se i kishte kërkuar viktimës që të mos e spërkaste rrushin, por ai jo vetëm nuk e kishte dëgjuar, por edhe e kishte fyer.
Ndërkohë, edhe të afërm të të moshuarit konfirmuan dje për “Gazeta Shqiptare” se ngjarja e rëndë e ndodhur mëngjesin e së enjtes në lagjen “Shkallë” të Borshit ka pasur shkak një sherr banal mes dy bashkëfshatarëve. Nipi i viktimës, Adriatik Lapaj tregoi me lot në sy se si u ekzekutua Et’hem Brahimaj. “Ne jemi 15 nipër e mbesa në atë derë. Gjyshi ishte duke hapur derën për të shkuar në bahçe për të spërkatur rrushin. Në atë moment kishte kaluar afër banesës së tij një vajzë nga lagjja, e cila e kishte pyetur: Çfarë po bën xhaxha Et’hem. Ndërsa gjyshi i ishte përgjigjur:
Po ja o bijë, po shkoj të spërkas hardhitë se tani është koha. Kaq i kishte thënë vajzës, e cila kishte vijuar rrugën. Por, pas pak ajo kishte dëgjuar një krismë arme, ndaj ishte kthyer mbrapsht. Vajza e kishte gjetur gjyshin të rrëzuar në tokë dhe të mbuluar me gjak. Ai nuk kishte arritur të hapte derën e bahçes, pasi Sokrat Xhuveli e kish qëlluar nga mbrapa koke. Gjyshi kishte mbetur i vdekur në vend. Dy dhi race kishte Sokrati dhe ato i mbante në shtëpinë e tij, që e kishte afër me atë të gjyshit”, tha nipi i viktimës. Ky i fundit pohoi se janë shokuar nga ajo që ndodhi. “Është e tmerrshme t’i marrësh jetën tjetrit ashtu kot më kot. Jemi shumë të tronditur”, u shpreh i riu.
Ndërkaq, banorët e fshatit Borsh pohuan se autori i vrasjes, Sokrat Xhuveli është një person i shpërfillur nga familja, i divorcuar nga bashkëshortja tri vite me parë. “Pas ndarjes nga gruaja, Sokrati jetonte vetëm, ndërsa fëmijët i ka në emigracion. Ai endej rrugëve dhe njihej nga të gjithë si konsumator i pijeve alkoolike”, u shprehën disa banorë. Sipas këtyre të fundit, 78-vjeçari Et’hem Brahimaj, baba i gjashtë fëmijëve ishte njeri i qetë, punëtor dhe i respektuar në të gjithë zonën. Nga ana tjetër, burime nga policia e Vlorës bënë me dije se 53-vjeçari Sokrat Xhuveli akuzohet për veprën penale “Vrasje me dashje”. Pritet që Gjykata e Vlorës të vendosë masën e sigurisë në ngarkim të tij.
Pas vrasjes së 78-vjeçarit, policia vuri në pranga agresorin, ndërsa deklaroi se ngjarja ka ndodhur për motive të dobëta. Ndërkohë që burime pranë vendit të krimit deklaruan se i moshuari u qëllua për vdekje nga fqinji i tij pas një konflikti për motive pronësie (për një kasolle bagëtish). Ndërsa, burime të tjera u shprehën se sherri me nusen e djalit i kushtoi jetën viktimës. Mësohet se autori i krimit është komshiu, por edhe daja i nuses së djalit të Et’hem Brahimajt.
