Ambasadori i OSBE-së në Shqipëri, Bernd Borchardt e ka quajtur një shembull të keq për gjithë rajonin djegien e mandateve nga opozita.
“Është kritikuar nga të gjithë ndërkombëtarët sepse është fitili që i vë flakën të gjithë sistemeve parlamentare. Radhës tjetër ata mund të gjejnë argumente për të bërë të njëjtin veprim pas tetë muajsh apo një viti. Ky do të ishte një shembull i keq për gjithë rajonin”, është shprehur ai, duke konfirmuar kështu se ndërkombëtarët përveç krizës politike në Shqipëri, i druhen krijimit të një precedenti të rrezikshëm për demokracinë në Ballkan.
Më pas ai ka folur për zgjedhjet lokale dhe se a do t’i njohë OSBE ato nëse nuk merr pjesë opozita. Borchardt është shprehur se OSBE nuk e nxit aspak bojkotin zgjedhor.
“Kjo varet nga mënyra si shkojnë zgjedhjet, si zhvillohen ato dhe gjetjet e vëzhguesve tanë. Ne nuk nxisim aspak bojkotin zgjedhor. I kemi bërë thirrje dje partive të sjellin kandidaturat. Për shumë kohë Shqipëria ka qenë shtylla apo simbol i stabilitetit në rajon dhe tani shohim një veprim në parlament që nuk ka precedentë”, është shprehur Bernd Borchardt./Opinion.al
