Edi Nikolas Bojom, mbrojtësi që sezonin e fundit luajti për Luftëtarin, ka shumë rezerva për ekipin gjirokastrit pasi sipas tij nuk i ka shlyer të gjithë detyrimet që ishin të parashikuara në kontratë. Kamerunasi shkon edhe më tej duke thënë se nëse situata vijon e njëjtë atëherë është i detyruar të ankohet në FIFA. Sa i përket të ardhmes Bojom flet pa doreza teksa tregon se ka shumë oferta nga Europa dhe Azia, por nga skuadrat shqiptare Tirana është e vetmja që e ka kontaktuar zyrtarisht, raporton “panorama sport”. “Pas përfundimit të sezonit me Luftëtarin, kam pasur kontakte të vazhdueshme me klube në Arabinë Saudite, Turqi, Rumani dhe Ukrainë. Menaxheri ka folur më konkretisht dhe për momentin jam në pritje për të parë se çfarë do të bëhet”, ka thënë fillimisht 28-vjeçari. Bojom luajti 30 ndeshje me gjirokastritët në kampionatin e fundit, duke shënuar edhe dy gola, pikërisht në barazimet 2-2 të Luftëtarit në transfertë ndaj Laçit dhe Vllaznisë.
I pyetur nëse ka marrë ofertë zyrtare nga ndonjë klub shqiptar, Bojom zbulon gjithçka. “Po, ka qenë Tirana që më ka kontaktuar. Ata dëshirojnë që unë t’i ndihmoj në Ligën e Europës. Në fakt, prisja që diçka e tillë të ndodhte me Luftëtarin, por nuk u kualifikuam. Është një ide e mirë dhe unë mund të vij te Tirana, por për momentin ka një problem administrativ, kështu që është e pamundur”, sqaroi shtatlarti kamerunas.
Përpara se të mbërrinte në Shqipëri në verën e vitit të kaluar, Bojom ka qenë për disa sezone pjesë e klubit kampion të Angolës, Rekreativo Libolo. Më pas mbrojtësi u transferua në kampionatin qipriot tek AEL Limasol, por për shkak të një dëmtimi që e la jashtë fushave disa muaj, Bojom iu bashkua Luftëtarit në formë huazimi, duke bërë një sezon mbresëlënës.
PROBLEMET
“I zhgënjyer dhe i lënë në harresë nga klubi”. Kështu e përkufizon kamerunasi situatën te Luftëtari pas përfundimit të sezonit. “Mbyllëm një vit mbresëlënës, duke arritur vendin e katërt. Mirëpo, unë tashmë nuk jam në gjendje të them nëse do të vazhdoj të jem pjesë e Luftëtarit. Me keqardhje ju konfirmoj se klubi nuk e ka respektuar deri në fund kontratën me mua.
Jam shumë i zhgënjyer për mënyrën se si rrodhën ngjarjet në fund të sezonit. Prisja prej ditësh të paguhesha nga klubi dhe të kthehesha në Kamerun, por çuditërisht në ditët e fundit të gjithë u zhdukën. Kisha për të marrë rrogën dhe bonusin, por askush nuk më dha një përgjigje pse kjo po vonohej.
