Deputeti i “LIBRA-s”, Ben Blushi ka kritikuar ashpër buxhetin e qeverisë ‘Rama’ për vitin e ardhshëm, duke nënvizuar se i mungojnë politikat për punësimin, varfërinë, bujqësinë dhe shëndetësinë.
Blushi ka pyetur se kush është politika themelore e këtij buxheti? Sipas tij, kjo është thejsht një politikë elektorale, duke u dhënë pensionistëve nga 3 mijë lekë. Ai theksoi se ky buxhet u merr më shumë të varfërve se të pasurve.
Më tej, Blushi, bëri me dije se barra fiskale në këtë vend rëndon më shumë mbi ata që kanë një punë se sa mbi ata që bëjnë biznes, duke thënë se raporti është 2.3% e buxhetit me 1.8% e buxhetit.
“E dini ju kush taksohet më shumë dhjami apo trurin? Të taksosh dhjamin do të thotë të taksosh më shumë atë që ka më shumë. Ndërsa të taksosh trurin atë që ka mësuar më shumë dhe që punon më shumë”.
Blushi më tej kritikoi dhe politikat e ndjekura për koncesionet publik-privat që qeveria tha ai e quan PPP. Ai tha se tetë koncesione marrin më shumë para se sa buxheti i parashikuar për studentët.
Blushi foli dhe për ligjin e importit të mbetjeve duke thënë se me miratimin e këtij ligji do të rritet akoma edhe më shumë vdekshmëria nga kanceri që ka arritur rekord për 1 mijë banorë. Për rritjen e vdekshmërisë edhe në mosha të reja nga kanceri, Blushi tha se ndikon edhe ushqimi që importohet në vendin tonë.
Ish-deputeti i Partisë Socialiste, Ben Blushi duke deklaruar votën e tij kundër buxhetit të vitit 2017, u shpreh se, vitin e kaluar e votoi duke mbyllur hundët kurse këtë vit i ka të hapur.
