Deputeti Ben Blushi, deklaratën e ish kryeministrit Berisha se populli duhet të armatoset, e ka quajtur thirrje fatale. “S’kam replikë me njeri se s’më ka përmendur njeri falë Zotit, por ndihem i kërcënuar nga ajo që bëtë sot. U bë një deklaratë që s’mund ta pranoj, e këtë e tha një ish president, ish kryeministër, një personalitet tha ‘merrni armët kundër kësaj qeverie”, tha Blushi në foltoren e Parlamenti.
Fjala e Blushit në Parlament
U bë këtu një deklaratë që nuk mund ta pranoj. Këtë nuk e tha një njeri dosido në rrugë, e tha një ish President, një ish Kryeministër, një personalitet i mirë apo i keq në Shqipëri dhe tha ‘merrni armët kundër kësaj qeverie’. Unë kam shumë arsye për të qenë kundër kësaj qeverie dhe ju e dini.
Po ti thuash shqiptarëve merrni armët për tu mbrojtur është fatale. Këtë nuk e tha një njeri dosido, e tha një njeri që e ka bërë një herë. E ka bërë në vitin 1997 dhe viktimat e atij viti jemi të gjithë ne.
Kam 3 muaj që përpiqem tu provoj shqiptarëve se ku e çon marrëzia e një njeriu një parti. Ky është rasti juaj sot. Për të mbrojtur Saliun po mbroni atë që tha ai që të armatosemi të gjithë. Dua tu pyes.
Ed Palokën kam 20 vjet që e njoh: je dakord ti që ai që të shet picën të ketë një pistoletë poshtë picës? Po ti Jozefinë je dakord që kur shkon te parukierja të jetë me pistoletë poshtë banakut. Po ti Ristan, të kam pas në shkollë, je dakord që kur hipën në taksi të ketë një pistoletë poshtë sediljes? Për çfarë vendi po flasim?
Ti (Topalli) u çove ta rregullosh atë që tha Berisha, për të na bindur që ta bëjmë armatosjen me ligj si në Amerikë. E para nuk tha këtë. Edhe nëse tha këtë bashkë me ty, është edhe më keq.
Në Amerikë po e reduktojnë përdorimin e armëve zonjë. Ky është debat në të gjithë botën. Ky debat nuk bëhet as në Francë, as në Gjermani as në Angli, por po na çon në Amerikë. Po çfarë kostoje kemi ne?
Ne jemi vend që vuajmë nga përdorimi i tepërt i armëve për 500 vjet dhe po na i ktheni armët prapë. Unë besoj që ky debat duhet të shterojë. Ju duhet ta mbyllni këtë debat. Çfarë mendon një varfanjak që beson se komshiu i tij ka fituar një pronë me pa të drejtë? Të shkojë të marrë armën dhe t’ia marrë?
Po çfarë mendon një njeri që për arsye vetëgjyqësie në Pukë apo në Shkodër nuk e do shkojë të marrë armën me frymëzimin e Saliut? Po ai i persekutuari në 40 vjet, drejtësinë që nuk e gjeti dot dhe nuk e ndëshkoi dot prokurorin e vet të padrejtë do shkojë të marrë armën ta vrasë?
Këtë po thua pra. Shullazi nuk e justifikon atë që tha Sali Berisha. Banda në Shqipëri, ka pasur dhe do ketë, po kjo nuk nënkupton që të gjithë të mbrohemi nga bandat duke krijuar banda nëpër shtëpi. Të kesh një armë në shtëpi je një bandit, pa dyshim. Kjo është arsyeja që dola këtu.
Tërhiqeni atë që thatë se është fatale.
Keni çfarë keni me Sajmir Tahirin, i besoni apo jo, nuk më intereson fare, por nuk mbroheni dot nga Sajmiri duke shpërndarë armë nëpër Shqipëri.
Tërhiqeni Jozefinë këtë sepse është katastrofë.
Çfarë i thoni sot vendeve fqinje? E dini që ka nja 34 vende që jetojnë me idenë që nga Shqipëria vjen një zjarr që mund ti djegë?
Çfarë i thoni sot popullit?
Të armatoset për çfarë?
Për tu mbrojtur nga Sajmir Tahiri?
Për kaq pak doni të na armatosni të gjithëve?
Lëreni këtë debat dhe mos dilni ta shpëlani atë që bëri Saliu se është katastrofë. Do dilni në fushatë pas një viti dhe do thoni të bëjmë një ligj për armët?
Dilni, bëjeni. Si kundërshtar do më pëlqente, por si shqiptar është kërcënuese. 1% mund të jenë shqiptarët që mund të duan të kenë një armë me leje në brez. Sepse në qoftë se unë kam një armë me leje, komshiu im do marrë një armë pa leje për tu mbrojtur nga unë, sepse ky është mentaliteti jonë. Tërhiqeni këtë sepse është katastrofë, është turp për ju.
