Një person është arrestuar nga policia e Tiranës, pasi akuzohet për shpërndarje të drogave të forta në doza të vogla.
Mësohet se në pranga ka rënë 22-vjeçari R. M., mbi të cilin rëndon akuza “Prodhimi dhe shitja e narkotikëve”.
Po ashtu, policia ka goditur dhe një rast të pastrimit të veprimtarisë kriminale. Duke proceduar në gjendje të lirë 32-vjeçarin E. P.
Është proceduar penalisht edhe 32-vjeçari A. M., banues në Tiranë, i cili akuzohet “Moskallëzim Krimi”.
Gjatë operacionit të koduar “Blloku”, policia sekuestroi në cilësinë e provës materiale; një sasi kokaine, një automjet si dhe sasi parash në euro, dollarë, franga zvicerane dhe lekë.
Njoftimi i policisë
Goditet një tjetër rast i shpërndarjes së drogave të forta në doza të vogla, si dhe një rast i pastrimit të produkteve të veprës penale ose veprimtarisë kriminale.
Finalizohet operacioni policor “BLLOKU”, i zhvilluar nga Komisariati i Policisë Nr 2, në bashkëpunim me Seksionin për Hetimin e Narkotikëve.
Arrestohet në flagrancë një shtetas dhe procedohen penalisht dy të tjerë.
Sekuestrohet kokainë, franga zviceriane, euro, dollarë e lekë, si dhe një automjet.
Specialistët për Hetimin e Krimit në Komisariatin e Policisë Nr 2, pasi kishin marrë informacion në rrugë operative se një shtetas duke qarkulluar me automjetin e tij shpërndante kokainë në doza të vogla, kanë organizuar dhe finalizuar operacionin policor “Blloku”.
Si rezultat i operacionit në rrugën “Brigada e 8”, nga punonjësit e policisë të Komisariatit të Policisë Nr.2, është ndaluar për për kontroll mjeti tip “Benz” me drejtues shtetasin R.M, dhe me pasagjerë shtetasit A.M. dhe E.P.
Gjatë kontrollit në pjesën e brendshme të monitorit të kasetofonit policia gjeti dhe sekuestroi 43 doza me lëndë narkotike të dyshuar kokainë.
Po gjatë kontrollit fizik të shtetasit E.P, policia gjeti dhe sekuestroi në cilësinë e provës materiale një sasi prej 25500 franga zviceriane, 600 euro, 49500 lekë dhe 100 dollarë.
Në cilësinë e provës materiale u sekuestrua edhe automjeti në posedim të shtetasit R. M. si dhe 6 telefona celular në posedim të shtetasve të lartpërmendur.
Në përfundim të veprimeve të kryera nga Seksioni për Hetimin e Narkotikëve në D. V. P. Tiranë, u bë e mundur arrestimi në flagrancë i shtetasit:
– R. M., 22 vjeç, banues në Tiranë, për veprën penale “Prodhimi dhe shitja e narkotikëve”.
Si dhe u proceduan penalisht në gjendje të lirë shtetasit:
– E. P., 32 vjeç, banues në Tiranë, Sauk, për veprat penale “Pastrimi i produkteve të veprës penale ose veprimtarisë kriminale” dhe “Moskallëzim Krimi”.
– A. M., 32 vjeç, banues në Tiranë, për veprën penale “Moskallëzim Krimi”.
Materialet proceduriale do ti kalojnë Prokurorisë pranë Gjykatës së Shkallës së Parë Tiranë, për veprime të mëtejshme hetimore ./ Opinion.al E.Xh.
